Nilen Par Mawi Nih Visa A Sok Lonak A Ruang Fianternak
Tawk Tling Thang| 2019 February 11| Chin Community of Indiana (CCI) nih tukum Chin Miphun Ni ah hlasa ding in Myanmar ram hlasak thiam cheukhat an sawmmi chung ah Nilen Par Mawi nih visa a sok ti lonak a ruang a tanglei bantuk in a fianter.
Nilen Par Mawi cu US kal ding ah visa sok ti lo in a um. Hi kong ah mi cheukhat comment ah ziah a sok lo, a ngah khawhmi a si ko si. Hiti sok lo in a um hi CCI upa a upat hna lo bia a si lo maw? Amah rat lai kan i ngaih ngai si tiah a titu an tam ngai.
Cu ruang ah visa a soklonak a ruang The Chinland Post nih fiang deuh in biahalnak kan tuah than tikah atu bantuk in a fianter.
“Visa ka soklonak a ruang hi ka ngah lai lo ti ka ruah ruang bik ah a si lo. Cun, CCI upa hna sawmnak ka upat lo ruang zong ah a si lo. Ka u Sung Tin Par visa a ngah lo ti aa fian hnu ah CCI upa hna nih concert tuah dingmi an leet. Cuti concert an leet ruang ahcun visa ka va sok lonak a ruang bik taktak cu a si. Visa va sok hrimhrim khi a hau ti lo”.
“Atu hi kanmah lei zong biatak te in khua kan ruah tikah atutan hi cu visa an kan pe ti lai lo ti kan fiang ngai. Mah caah cun kanmah lei i concert tuahding zong a caan nih a kan pe ti lo. Hmailei tu ah pathian nih caantha kan pe te ko seh mu. Thlacam bu in kan i zuam lenmi a tlamtling lomi cu i lungsak ko usih mu. Bawmhnak lungthin na ngeimi na kan siaherhnak cung ah kan i lawm. Visa na sok i na hmuh lo tikah hmailei caah na tha lai lo kan ti. Mah caahcun visa zong na luh lo ah a tha tiah kan ruah. Kanmah lei chambaunak a um ahcun kan ngaithiam. Hmailei ah caantha um hraam ko seh. Miphun caah Bawipa nih thluachuah in pe chin ko seh” tiah CCI Vice President nih Concert Leetnak kong he pehtlai in ca a kuatnak kong Nilen nih a fianter.
Hi kong ah CCI upa zong The Chinland Post nih messenger in pehtlaihnak kan tuah ko hna nain an kan let lo i kan pehtlai kho hna lo.
CCI upa hna nih tukum Chin Miphun Ni ah hlasa ding ah Myanmar lei in an sawmmi hna cu Chaw Suh Khin, Thang Paa, Ni Len Par Mawi, Sung Tin Par, Fred Hlim Puia an si. Thang Paa zong hi visa a sok i a ngah ve lo. Cucaah, aho hmanh an kal kho than lai lo tiah theih a si.
Nilen Par Mawi cu Aa Thang Composer, Tawk Men, Biak Tha Cuai, Mercy, Van Siang Mang, Cung Hlei Lian le Fiakfairock band in hlasak thiam hna he Hakha ah tuahdingmi Chin Miphun Ni ah hlasaknak in caan an hmang lai tiah kan theih.
About The Author
