Thailand Ram Ah Kawlram Minung Citmi Bus Mei A Kang I Minung 20 An Thi
TCP-Online| 2018 March 31| March 30 ni zinglei suimilaam 2 tluk ah Thailand ram khualipi Bangkok in Mesauh lei a kalmi Bus, Kawlram riantuan minung citmi cu lam cungah mei a kang i minung 20 an thi ti thawng kan theih.
Bus mei a kanghnak hmun hi lam zong a thatnak a si ko, motor accident zong zeihmanh um loin a kangmi a si tikah mah a kanghnak kong hi felfai tein cithlat kan tuah lai tiah Bus a kanghnak peng i pennguk lutlai Charoenrit nih a chim.
Motor engine lei chambaunak a si lo hmanhah mah Bus nih hin minung tampi a phurh ruang silole ningcanglo in motor hna mawng a si ruangah a si kho men tiah mei a kanghnak hmun khuami hna nih cun an ruahdamh.
Mei a kanghnak in a luat khomi hna nih an chimning ahcun ‘Motor a lai hrawng in mei hi a van i thokmi si’ tiah an chim.
Kawlram in Thailand ram ah kuli rian a tuanmi hna cu March 30 ni khan Thailand in Kawlram lei a rak tlun i tubantuk in Bus mei a kangh tikah Kawlram riantuan minung 20 nunnak an liam. Mahti mei a kanghnak a ruang cem hi theih a si rih lo i Thailand palek nih cun a cithlat cuahmah lio a si.
Ref:VOA
About The Author
