Thantlang- Chin Miphun Ni Kong Khuakhannak An Ngei Rih Lo
Salai Elvis| 2019 February 12| Akum 71nak Thantlang ah tuah tawnmi Chin Miphun Ni cu zarhkhat tluk lawng caan aa duh cang nain timhtuahnak le khuakhannak an ngeih rih lo tiah kan theih.
Thantlang- Chin Miphun Ni kongah hrihhawhtu an um lo pin ah Chin ramkulh cozah nih rak tuah u timi nawlpeknak a um rih lo caah a tubantuk in timhtuahnak an hnut hi a si.
“Kumdang ah cun ramkulh cozah nih rak tuah u timi nawlpeknak a rak um bal rua. Penguk zung lei nih nawlpeknak a um rih lo an kan ti i kumdang ahcun nawlpek hnu lawngah tuah a si tawn ti ka theih. Cucaah a tu hi khuanu/pa le sangchung khuabawi hna nih hrihhawh le khuakhan dingin February 13 ah meeting tuah kan i tim i penguk bawi zong tuah dingin kan chimh lai. Tuah lo taitai cu a si kho lo. Asinain, kumdang tluk cun cun a sunglawi ti lai lo. A ruang cu timhtuahnak caan a um ti lo. Biachimnak te tuah i dihter maw a hauh te lai, zeitin khua kan khan lai theih a si rih lo. Cun ramkulh huap in Hakha ah tuah dingmi ah Thantlang mino Laam phu zong atu Panglong a kalmi hna hi rinh an si te ko lai” tiah khuanu/pa tuanvo ngeitu Pu Lawm Bik nih TCP ah a chim.
“Tukum Chin Miphun Ni cu a sunglawi theu lai tiah TYA mino zong nih timhtuahnak tha ngai in kan rak ngei chung cang nain a tu tiang hrihhawhtu an um lo cu a poi ngai te, tuah thai lo ding phun hna a si sual lai ti phan um ngai” tiah TYA mino EC pakhat nih TCP ah a chim.
Akum 70nak Thantlang Chin Miphun Ni cu Lai paih, Khuangcawi, Hlasaknak, Thilthuam hmuhsaknak, Laam, Show tibantuk tling ngai le sunglawi ngai in an rak tuah. Asinain, tukum cu zarhkhat lawng aa duh cang nain a tu tiang khuakhannak an ngeih rih lo pin ah kum dangnak in a sunglawi ti lai lo tiah kan theih.
About The Author
