COVID-19 Hakha Case 150 Video Kong Careltu Theihternak
COVID-19 Hakha
- The Chinland Post nih Hakha khualipi ah COVID-19 zawtnak an hmuh mi Case-150, siizung an kalpinak minute pali tluk a saumi cu Video in Facebook Page ah kan thlah. Hi kan thlahmi kong ah ruahnak a phunphun a chuah caah kan lung a tha hrim lo.
- The Chinland Post nih COVID-19 runven, dohnak le zohkhenh ralrinnak kong he pehtlaih in February thla hram thok in nihin ni tiang pehtlai tein kan hlat khawh tawk kan tial, kan chim, kan thanh lengmang mi a si.
- The Chinand Post nih nihin Video kan langhtermi hi Mizaw amah pumpak, a chungkhar lei hnorsuan duhnak le mizapi lauter ding in kan tuahmi a si hrimhrim lo. Kan khualipi ah “COVID-19 mizaw hmuh hmasa bikmi kong ah tuanvo le nawl ngeitu nih an tawlrel, an zohkhenh ningcang mizapi nih hmuhding le hngalhter kan duh caah a si.
- The Chinland Post nih “Zapi Caah” tiin thawngthanh le theihternak tuah tikah pumpak (privacy) kong ah buainak, le mizapi hmuhning i dannak hi a chuak theo tawn. The Chinland Post nih Mizapi caah timi le pumpak thilthup (Public interest and privacy) hi Media zulhphung zoh in kan ruat ngai ngai ko. Hihi zapi ca thatnak le ralrinnak a kan petu zong a si tiah kan ruah caah kan thlahmi a si.
- The Chinland Post nih, atu bantuk a ‘sensitive’ mi kong ahhin Mizapi runven/humhimnak (public interest) le a ingtuar mi pumpak/chungkhar (private interest) kong a fianglo tukmi ri ah a ummi thil a si hi kan zoh chih zungzalmi a si. Hihi atu lawng silo in, hmailei zong ah kan ton chin lengmang dingmi zong a si tiah kan ruah. Minung pumpak sinak in ahohmanh fahter le intuar mi zualhmatter chin nak ding kan duhmi a si lo.
- The Chinland Post kan thlahmi Video hi pumpak/chungkhar/Khuami hnorsuan duhmi silo Tuanvo ngeitu lei an riantuanning kan langhter duhmi an langhter duhmi a si caah nan kan theihthiamnak lai kan in nawl hna.
- The Chinland Post thazang a kan petu mi tampi nih nan kan fial bantuk in hi Video tawite hi zapi sin langhter rih lo ding ah a herh ko kan ti caah a kan haltu (careltu) hna upatnak in April 29, 9:35 pm ah Facebook in kan rak hnawh (expire) than. A karlak ah, The Chinland Post riantuantu pumpak sin ah siseh, Online in siseh ruahnak nan kan pekmi cung ah le thazaang nan kan pekmi cung ah lunglawmhnak tampi kan ngei.
Editorial Board
The Chinland Post
About The Author
