Hakha COVID-19 Hrik A Ngeimi Nu (Kum 18) Kal Umnak Theih Khawh Tawk le Theihngalh Minung Biaruahnak Part (1)

The Chinland Post-Hakha| 2020 April 29| Kawlram Ramkomh Ngandamnak le Lentecelhnak Zung nih April 29, 2020 zing 7:00am thawngthanhnak bantuk in Hakha ah COVID-19 Hrik a ngeimi Case.150 nu (kum 18) cu Tuluk ram in Kawlram a rak phanmi a si. Hi kong he pehtlai in a um kalning le Cozah lei nih zeitin dah an tawlrel timi zapi theih kho dingin kan van langhter.

Cozah lei rianngeitu upa zong kan pehtlaih hna nain a cheukhat cu an imanh lo ruang le phone an tlaih rih lo ruangah kan van langhter kho dih rih lo. Pehzulh in thawngpang a ummi kan rak langhter than lai. Hrik a ngeimi nu min kan rak langhter lai lo.

Cozah Cenan Cakuat 2020 April 16 Ca

Kawlram Ngandamnak zung le Lentecelhnak zung nih COVID-19 Mizaw No.150 fehtermi Nu (Kum 18) (Tiphul Khuami) cu Tuluk ram in Muse khuapi cu March 20, 2020 ah a phan, zan an riak I a thaizing Mandalay lei a lan i March 23 (Monday) 1:00 ah Mandalay a phan. Manalday Cargate pawngah a riak I March 24 (Tuesday) zing 8:00 ah Motor in a chuak i March 25, 2020 zing 1:00am ah Kalaymyo a phan. Kalaymyo Taung Za Lat Sang No. 3, a hawi sin ah a riak. April 5 zanlei 4:00 ah Kalay in Hakha lei a kai tiah Kalaymyo IPRD nih April 16 Cenan cakuat chirchan in Kalay peng Cozah thawngthanh zung (IPRD Kalay) nih an Facebook ah an langhter.

Cozah Cenan Cakuat April 16, 2020 ning ahcun Taungzalat Car Gate motor fami 6N/5162 motor rangmi in 4:00pm ah an chuak I April 6 zanlei 1:30 ah Hakha, zanlei 13:30 ah Tiphul an phan tiah an langhter. A pa (kum 50) nih Tiphul um rihnak kong Tiphul Cazi Pu Tha Lian nih Hakha penguk zungbawi U Myint Oo sin ah April 16, 2020 2:30pm ah thawng a thanh tiah aa tel. April 16, 2020 2:45pm ah Hakha penguk bawi nih Hakha siizung zunguk Dr. Mang Biak Kung cu thawng an theihter i April 16, 2020 3:30 ah Hakha Facility Quarantine chiahnak an phak pi tiah aa tel. Hi ni an chiah lio ah Pa minung (8), Nu (4) an zapi minung (12) an um tiah theih a si.

Facilty Quarantine Um Ve Mi Pakhat he

April 21, 2020 (Tuesday) kan hnu zarh lawngah Facility Quarantine ah a rak lutmi a si. Kalay Home quarantine ah kan in chiah tiah an ka ti i Nurse le rianngeitu pakhat zong nih an rak ka zoh ballo a ka ti. Hakha hna a phak in Khua hna ka kal, Stawberry dum hna, Tiva hna a hawi le he an kalnak kong a chim. Pyidawta ah ka pu a um, Khuathar lei ahkhin ka unu va le an um a ti. Hakha khuathar lei ka um lio ah Tuluk a tlungmi tiin an ka report I an ka tlaihmi a si tiah a ka chim. Tikholhnak pakhat, tipung pakhat kan ihrawmmi hi kan sia a remlobikmi a si. Mizaw cu 10:00am lawngah siizung an kalpi khawh. (COVID-19 hrik ngeimi he an ichonhbiaknak kha TCP ah a chimning a si) Nan ichonhbiakmi tih a nung lo maw ti biahalnak bel cu mask hrukbu lamhla nawn I biaruahnak a si I ka him ko lai tiah ka ruah.

Tiphul Khuabawi Pu Phun Cung Chonhnak

A damlo tiah timi kan fanu hi Tuluk in a rak kir lai tiah kan theih le cangka in kan thin a phang cio i khua lei rat lo in Hakha siizungah lei khual chiahnak ah um seh tiin khua upa meeting kan ngei. Cu tikah Kalaymyo ah ni (14) Home Quarantine an chiah cangmi cu a poi lai lo a tha ko lai tiah kan khua Nurse lei nih an ti caah khua zong cu a rak phan ko. Khua ah zarhkhat hrawng a um.

Hakha penguk zung zong thawng kan thanh hna nan ka cun a tlam a tling lo, ca in rak tial u a kan ti caah zeihmanh kan tuah tilo. Kanmah khua Nurse sin zongah report kan pek I cunglei a chimh tik hna ah Kalay ah zarhhnih an chiah cangmi cu a ngah ko an kan ti.

Cu ticun khua ah zarhhnih a um hnu ah Hakha ah a u le a chung le sin um ah a va kal I Hakha thawngpang a chiat le cangka in Hakha Khual chiahnak ah an va chiahmi kha a si.

A chungkhar umtti a nu le pa a nau tiah an zapi minung (4) an si. Khuate lei cu ralrin awk kan thei lo i a duhnak paoh ah a kal a leng ko. Kan khuapi in kan zawtnak an kan chek lo ahcun theih awk tha phun kan silo. A nu le pa zong lo ah an kal I ka va auhter hna lai ka ti. Tiphul hi inndong 100, minung 456 a ummi khua a si I Cozah lei nih Nurse (2) an chiahpiak hna. Hakha COVID-19 runvennak ah pakhat cu Hakha ah a um peng I Nurse (1) lawng khua ah a ummi a si.

Tiphul Nurse Nu he Chonhnak

Chimnak nawl a ngeimi ka si lo i Media nan si caah Peng Cozah sin ah chonh ko law a tha deuh lai.

COVID-19 Hakha Case.150 He Room khat a Umti Mi pakhat he Chikkhat

Room pe 50 fai a kaumi pakhat ah minung pathum a ki le ki in a kan chiah, eidin thilpek tbk ihrawmmi zeihmanh kan ngei lo I ruah awk ka thei lo. Ngakchia te a si rih tikah a zawtnak pakhat hmanh a lang lo. Hrik angei an ti tikah ka lautuk, rawl zong ka ei kho rihlo.

Zungput (Toilet) hi pakhat cio a kan chiahpiak, a zawmi hi Toilet No.2 a hman. A poi tuknak pakhat cu Tikholhnak room pakhat lawng kan ngei, Tipung pakhat lawng kan ngei. Cucu Nu minung 10 kan um I kan hrawm dih. Cucu Cozah lei nih tikholhnak le tipung a dang tein or pipe tal in kan pe hna sehlaw ka duh bik. Hand Gel zong kan ngei lo, an kan pe fawn lo. Mask zong ka luhnak I pahnih lawng an kan pek rih.

Rungrul thahnak sii kahmi zong nihin zawtnak an hmuh le cangka lawngin an rak kah ka theih. Felfai deuh in an kan kahpiak ahau. Kan dirhmun theih a si lo.

Chonh Khawh Rihlomi (An imanh deuh rihlo caa kan izuam cuahmah rihko)

Vuanci Pau Lun Min Thang

Dr. Mang Biak Kung

Hakha Peng Uk zung U Myint Oo