Covid-19 in Prince Charles a zaw, Dr. Mahathir a piang: Vawleipi ah 112,982 tluk an dam than
Salai Tluangkipthang| 2020 March 26 — Malaysia Prime Minister le Vawleicung cozah lutlai lak ah, upa bik a simi Dr. Mahathir, kum 94 cu March 25 ah check felnak an tuah than i, zawtnak hrik an hmu lo, ‘negative a si ko’ tiah The Star nih a thanh.
Dr. Mahathir cu Bandar Kuching MP Dr. Kelvin Yii Le Wuen, Covid-19 zawtnak a ngei tiah ruahmi he an i ton ruang ah, ni 14 chung inn ah erh (quarantine) in ngiatthlai a si ve. Nain, ngandamnak lei tuanvo ngeitu nih an nupa in March 25 an zohfel hna tik ah, Covid-19 zawtnak hrik an hmu lo, negative an si ko tiah theih a si.
Malaysia cozah nih chawhlehnak a khemkhammi a ni 8 nak an phan cang i, nizaan ah, April 14 tiang khenkham chap ding in nawl an chuah.
Dr. Mahathir le an nupi cu a ni 8 nak an phanh cangnak le ngandamnak riantuantu nih an zohfel hna lio hmanthlak Instagram ah “#Day8 #Staysafe #RoutineCheckup” tiah a tarmi hmuh khawh a si.
Nain, nihin zaanlei tiang ah, Covid-19 zawtnak cu a kar thluahmah ko tiah vawlei cozah kip nih an chimmi thawngzamca tampi nih an tial.
Nihin ah, UK Prince Charles zong zawtnak hrik an hmuh, ‘positive a si’ tiah thawngzamhca tampi nih an langtermi hmuh khawh a si.
Hi thawngpang tial lio ahhin, The Guardian Live thanh ning ahcun, vawleipi ah Covid-19 in a thimi hi minung 20,000 tluk an si cang. China nak in, Spain ah a thimi an tam deuh tiah a thanh.
Cun, John Hopkins University cherchan in The Guardian thiam nih a thanhnak ning ahcun, vawleipi ah hi zawtnak ruang ahhin, minung 20,499 an thi cang. Cun, vawleipi ah Covid-19 in a zawmi hi 451,335 tluk an si.
Nain, hi catial lio tiang ah, Covid-19 in a zawmi tampi chung in, minung 112,982 hi cu an dam than, an dam piang tiah John Hopkins University nih cun a langhter.
Cc: The Star, The Guardian
About The Author
