Myanmar Ram Hmun Kip Ah July 7 Ni Philhlonak An Tuah

Salai Mangpau | July 7, 2023|

U Newin chan lio ah a zalen lo mi phungphai le ralkap uknak tang ah Rangoon University an phanh tikah siangngakchia nih July 7 ni ah an lungtlinlonak le duhlonak kongkau ceihphai ding ah Rangoon University Students’ Union innpi [Building] hmai ah tonpumhnak an ngei. Ralkap nih siangngakchia hruaitu upa deuh tamlak te an rak tlaih hna. Mah July 7, 1962 ni philhlonak cu nihin July 7, 2023 kum ah Myanmar ram hmun kip ah an tuah tiah thawng theih a si. Kum 61 a ruah hnu zong ah U Newin chan buainak hi philhkhawh lo mi thil a si.
Ne Win Chan Buainak (1962-1988)

Asia ram pumpi ah a min a rak thang ve mi ram rum an rak ti mi Kawlram kha vawleicung dihlak ah ram sifak bik, Kawl miphun zong a tenau bik mi miphun pakhat ah a chiatchuahtu cu Ne Win a si. Sianghleirun siangngakchia mino hna nih ‘cozah nih cucu kan tuahpiak u’ tiah an duhnak an aumi kha an duhnak zul loin meithal in a kahter tu pa, 1988 kum ah siangngakchia 3,000 renglo nunnak a liamtertu, uktu ṭha lo a si.

Ne Win hi Kawlram muihnak chung ah a luhpitu a si ti awk a tlak. Kawlram chung um mipi vialte Kawl ralkap sal ah a cantertu a si ti hi al awk ṭha loin a um. Democracy phung ning in a rak um mi ram kha sersiam siloin a rak rawhter chin tu a si. Democracy timi ramuknak phunghram a ṭha ngaimi cu ralkap uknak lei ah a hnu ah a kirpi ṭhan. A hnu ah Socialist uknak in a rak rulh ṭhan.

Anih hi duhlonak a rak langhter mi siangngakchia le mipi thahnak le serhsatnak lam a rak sial hmasatu a si. 1962 kum ah Ne Win hruai mi ralkap nih uknak an rak lak tikah siangngakchia nih zalam an rak zawh i an duhlonak an rak langhter. Culio ah cun Kawlram President a rak si mi Shan miphun Sao Shwe Taik i a fapa cu meithal in thilak in a rak kahter hna.

1962 Kum Rangoon University Students’ Union Building Bomb Puahnak Le Buainak

General Ne Win hi a ngaingai ti ahcun Sianghleirun zong a rak kai balmi a si lo i Sianghleirun siangngakchia hi a rak huat hna pinah a rak tih hna. 2 March 1962 ah General Ne Win hruai mi ralkap nih nawlngeihnak hramhram in an rak lak [Aana-ting or Coup d’etat]. Ne Win nih nawlngeihnak a lakhnu in Rangoon University ah buaibainak a thawk colh. May 11 ah Rangoon University Sianguk (Rector) cu Ne Win cozah nih an uk tuk [pressure] ruang ah sianguk sinak in a chuak. University Council hruai ningcang zong an thlen. Council chung ah ralkap minung an hun telh hna. RU cu ralkap nih direct uk khawh ding ah an hun tuah. Cuticun ralkap nih an duhning poah in University hruai ningcang vialte an thlen dih i nawlngeihnak cu a dihlak in an i lak.

Cu bantuk a zalen lo mi phungphai le ralkap uknak tang ah Rangoon University an phanh tikah siangngakchia nih July 7 ah an lungtlinlonak le duhlonak kongkau ceihphai ding ah Rangoon University Students’ Union innpi [Building] hmai ah rak chuak in tonpumhnak an ngei. Ralkap nih siangngakchia hruaitu upa deuh tamlak te an rak tlaih hna.

Zanlei 5:30 pm hrawng ah ralkap mawṭaw pahnih in meithal he siangngakchia duhlonak a langhtermi lehrulh ding ah Mandalay Hall, Ramanya Hall le Chancellor Road ah an hung phan. Ralkap nih a rak lehrulh hna ningcang cu ṭha tein biaruahnak ngeihpi si hrimhrim loin sa le ral bantuk in siangngakchia cacawng liomi cu meithal [automatic rifles] in a rak lehrulh hna.
Siangngakchia minung pazeizat dah an thi timi hi a dikfel tein hngalh khawhmi a um lo. Ralkap nih an chim ning le midang chimmi a rak i khat lo. Ralkap nih cun siangngakchia 17 lawng an thi tiah a rak thanh. Nain Mandalay Hall lawnglawng ah hin siangngakchia 17 leng le a dang siangngakchia za renglo an rak thi. Cucu July 7 nihin bantuk ah hin a rak cangmi a si. Kum 58 fai a rau cang. Atu ah hin a nung mi tampi an um ko rih.

Cun a thaizing July 8, 1962 zingka sml. 6 ah tuanbia ah min a ngei mi le a langsar mi Rangoon University Students’ Union Building [Innpi] cu bomb in ralkap nih an rak puah. Cuticun ralkap cozah tang ah kum caan saupi (nizan tihni) taktak te tiang kan hung um. Kumzabu a cheu fai hramhram in a kan uk. A kan pen. Atu zong kan um khan a si rih ko. Ralkap cozah tang ah cun Mirang hmanh rak doh kho ding tiang in mino a hringsor tu Sianghleirun ṭha cu hrawh hram an hun thawk. Sianghleirun siangngakchia pawl cu khua kiken ah chiah an hung si. Nihin Thein Sein Cozah tiang zong ah Sianghleirun cu khuachung an hung lut kho ti lo. Khualeng ah an i benh dih. Cucu siangngakchia nih kan buai kho hna hlah seh tiah ralkap nih an rak i timhtuahmi kha a si.