SAC Ralhrang Cu Lamhla Drone In Kahdohding Lam Thar A Um Cang
Salai Mangpau | July 7, 2023|
Mipi harsaknak pek in a that lengmang mi SAC ralhrang rual cu Kilometer lamhla in Bomb a phor kho mi Drone in kahkhawhnak lam cu thiamsang pawl he komh in kan tuah lai tiah Federal Wings rianṭuantu nih a chim.
Drone sawhsawh hman mi si loin lamhla Kilo meter tampi a zuang kho mi VTOL (Vertical take –off Landing Drone 12) he kahdoh ding in Federal Wings sin in thawngtheih a si.
“Atu kan ser mi Drone hi Kilometer 8/10/15 lam hla a zuang kho mi a si. Mah bantuk Drone hi voi dang hman peng mi drone a si ti lai lo” tiah Federal Wings rianṭuantu nih a chim.
“VTOL Drone ah lamhla raldohnak le ral thawngpang, sining hlatkhawhnak planning tuahnak ding ah ramchung, ramleng thiamsang komh in kum 1 chung rian kan ṭuan cang. Mah tein drone serchuahnak a phunphun aa tel mi (composite) thiamsannak cu ser thar chuah a si cang” tiah ramchung mipi sin ah thawngthanhnak a tuah.
Mah thiamsang caah a herh mi Research & Development (R&D) rianṭuannak cu Federal Wings nih aa zuam cuahmah lio ah mipi lei in tangka bawmh an herhnak zong Federal Wings sin in theih a si.
Federal Wings Drone serchuahnak ding ah Federal Wings, Cobra (Campaign) KNDF/B-15 (Campaign) le Yaw area Drone ralkap (Campaign) fonh in programme 3 kan ngei mi ah mipi bawmh an herh kong a chim.
2023 thla 6 chung ah SAC ralkap pawl Drone in kahdohnak voi 281 an tuah tiah July 3 ah cathanh an chuah. Mah drone kahnak hmun hna cu, KNU Brigade 6, Brigade 3 le Sagaing ramṭhen hmunhma cheukhat hna ah kahdohnak an tuah. Cu kahdohnak pawl ah bomb phun 680 hrawng an hman tiah an langhter.
Drone in bomthlaknak chung ah SAC chungtel 50 hrawng an thi i hliam an tuar mi tampi an um tiah an langhter fawn. 2023 kum cheu chung ah Federal Wings phu chungtel 1 a nunnak a liam, 6 hliam an tuar i 1 cu an thlop lio a si tiah theihternak an tuah.
2023 thla 6 chung ah NUG MOD kuttang ah Federal Wings (1801) Drone Battalion cu phungning tein an dirh khawh i Sagaing ramṭhen chung ah kahdohnak an thawk cang tiah an thanh.
Federal Wings Drone phu nih 2022 chung zong ah kahdohnak voi 430 leng an tuah khawh i SAC ralkap 200 hrawng an thi, SAC chungtel a za leng in hliam an tuar tiah Federal Wings phu nih cathanh an chuah.
About The Author
