Nikhat chungah Covid mizaw thar 16 an hmuh, Thai ram ah Covid-19 in minung 23 an thi
The Chinland Post | 2022 July 21 – Myanmar ram, nikhat chung lawngah Covid-19 mizaw thar 16 hmuh a si tiah SAC kuttang ngandamnak zung nih July 20 ah a thanh.
A luancia sml 24 chungah Laboratory sample 5,102 check a si i mizaw thar 12 hmuh a si caah zawtnak rungrul 0.31% a um tiah a langhter.
Covid-19 zawtnak in a thi chapmi an um lo caah Covid-19 in a thi cangmi minung 19,434 an si tiah a thanh.
Myanmar ram pumpi in Covid-19 zawtnak aa chawnhmi 613,871 an um i zawtnak in a dam cangmi 592,766 an si tiah cathanh ah a telh chih.
Cun a luancia ni tlawmpal ah Omicron mizaw thar hmuh a si i Omicron zawtnak BA.4 le BA.5 a ngeimi hi ramdang in Myanmar ram ah a rak phan ṭhanmi Myanmar rammi an si i riikhiahmi nicaan chungah adang tein thlopbul an si. An ngamdam ngai cang tiah a ṭial.
Asinain a cunglei thanhmi hi CDM sizung pawl, CDM Laboratory ah check mi aa tel lo i SAC kuttang ralkap sizung lawngah check mi a si caah zawtnak i chawnhnak le a thimi he pehtlai in a fiangmi cazin theih a si lo.
NUG kuttang ngandamnak zung nih cun Covid-19 zawtnak thar hi a zarh chung te ah vawlei pumpi ning in a karh tiah WHO cathanh charhchan in thawng a thanh ve.
Southeast Asian chung zongah Covid-19 zawtnak 20% a karh i a thimi 16% tiang a kai. Mizaw thar hmuhnak a karh lio caan ah Covid-19 zawtnak B.A.5 le B.A.4 a ngeimi an tam tiah a thanh.
Cun, Covid-19 zawtnak ruangah Emergency caan karh a simi Thai ram sml 24 chungah Covid-19 mizaw thar 2,607 hmuh a si i minung 23 cu Covid-19 zawtnak in an thi chap tiah Thai ram ngandamnak zung nih a thanh.
Cucaah mipi hna nih Covid-19 khamhnak sii i chunh hrimhrim ding le Covid-19 he pehtlai in zulhpung vialte pehzulh rih ding a biapi tiah NUG nih forhfialnak a tuah.
About The Author
