Sml 24 chung ah Covid-19 zawtnak aa chawn mi le a thi mi kan hmu lo tiah SAC nih a thanh
A volunteer tests the blood pressure of a coronavirus (COVID-19) patient in the town of Kale, Sagaing Region, Myanmar, July 6, 2021. Picture taken July 6, 2021. REUTERS/Stringer
The Chinland Post | 2023 February 7 – Myanmar ram, a luancia sml 24 chung ah Covid-19 zawtnak aa chawnh mi le a thi mi pakhat hmanh kan hmu hna lo tiah SAC kuttang ngandamnak zung nih February 6 zaanlei ah a thanh.
A luancia sml 24 chung ah Laboratory sample 3,282 an check i mizaw thar pakhat hmanh an hmuh lo caah zawtnak rungrul an hmuhmi hi 0% a si.
Covid-19 zawtnak in a thi chap mi an um ti lo caah Covid-19 in a thi cang mi minung 19,490 an si tiah a thanh.
Myanmar ram pumpi in Covid-19 zawtnak aa chawnhmi 633,842 an um i zawtnak in a dam cang mi 614,314 an si tiah cathanh ah a telh chih.
Asinain a cunglei thanh mi hi CDM sizung pawl, CDM Laboratory ah check mi aa tel lo in SAC kuttang ralkap sizung lawng ah check mi a si caah zawtnak i chawnhnak le a thi mi he pehtlai in a fiangmi cazin theih a si lo.
SAC kuttang ngandamnak zung nih Covid-19 zawtnak i chawnh le a thimi cazin nifatin a thanh kha hmuh khawh a si i atulio caan hi i chawnhnak 1% hmanh a um ti lo i a thimi an um lonak ni zong a um tiah a chim.
Myanmar ram ah hramhram in uknak lak a si hnu kum 2 caan chungah ram buainak, sipuazi, zatlang nun le mipi ngandamnak i zohkhenhnak a lamkip in a ṭumchuk.
Cucaah mipi hna nih Covid-19 khamhnak sii i chunh hrimhrim ding le Covid-19 he pehtlai in zulhpung vialte pehzulh rih ding a biapi tiah NUG nih forhfialnak a tuah.
About The Author
