Trump Le Kim Jong-un Tonbiaruah Biakhiahnak Um Lo In An Dihter
TCP-Thantlang| 2019 February 28| Vietnam ram ah nihnih chung tonnak biaruahnak a ngeimi America President Trump le North Korea ram lutlai Kim Jung-un cu biakhiahnak um lo in an dihter tiah White House nih Febuary 28 ni ah a phuan. Nuclear hriamnam hrawh ding ah timhcia ka si tiah Kim Jong-un nih media sin ah a chim.
Trump le Kim Jung-un cu mitluangtlam an si bantuk in an i ton sawhsawh bia lawng a si tiah American White House thawngthanh phu nih an langhter.
“Hi hna pahnih cu Nuclear hriamnak hrawhnak kong le chawlehthalnak kong le thil dangdang kong biaruahnak an ngei ko nain biachahnak le biahrennak cu an ngei lo. Asinain cu he aa pehtlai mi kongkau ah tonnak an ngei than te kho” tiah White House in chimnak nawl ngeimi pakhat nih a chim.
Trump le Kim cu Vietnam ram Hanoi Metropole Hotel ah anmah ram caan suimilam 1:25 in an umnak Hotel in an chuak i mah hna pahnih cu zinglei ah innka khar khumh in tonbiaruahnak an ngei nain bia hrennak le minsenthutnak an ngei kho lo tiah AFP nih a tial.
An i ton dih ei ding ah ti rawl a cia sa tein an timhtuah piak mi hna zong caan an ngeih lo caah ei lo in an hrawk than. Hi an i tonnak kong zong Vietnam ram tuanvo ngeitu hna nih thawngfiannak tuah an timh tiah kan theih.
Tutan an i tonnak a dih hnu Media hna he an i tonnak hmun ah an pa hnih in an i tonnak kong tlamtling hlah seh law a dawh, an mithmai zong a chia ngai. Media hna nih Nuclear hrawhnak kongah timhcia nan si cang maw timi biahalnak an tuahmi cu Kim Jung-un nih, “timhcia kan si lo ah maw hika hmun hin ka rat lai” tiah a leh hna.
Trump nih “bialehnak na tuahmi vialte hna lakah a tu na lehmi hna hi hmual a ngei bik” tiah a chim ve.
2017 June thla avoi khatnak Singapore ram i ton lio ah biakamnak an ngeihmi chung ah North Korea nih a ngeihmi Nuclear hriamnam cu hrawh dingin kaphnih biakamnak an rak ngei bal tiah kan theih.
Hika ah Vietnam i ton biaruahnak an ngeih lio video zoh khawh a si.
Ref: Duwun
About The Author
