A fekfuan mi phu kan ser lai i mipi kan humhim hna lai tiah CDF-Mindat nih a thanh

The Chinland Post | 2022 November 25 – Chin ramkulh, Mindat peng hriamtlai phu a si mi CDF-Mindat nih a fekfuan deuh mi le a ṭhawng deuh mi phu kan ser lai i mipi kan huhim hna lai tiah a thanh.

November 22-23 ah an tuah mi CDF-Mindat i Brigade Commander, Second Brigade Commander, Department hruaitu pawl, Tactical Commander pawl le Battalion Commander pawl tonnak meeting a dih hnu ah atu bantuk in an thanh hi a si.

Cu tonnak ah hmailei caan i an tuah ding rian pawl le ralkap chung thlennawnnak pawl zong an i ruah chih tiah theih a si.

Hramhram uknak a dongh i mah tein khuakhan lairelnak nawl tling tein a um mi Federal Democracy ramkomh a chuah khawh tiang lungrual tein le nunnak thap in kan ṭuan lai tiah an cathanh ah an langhter.

CDF-Mindat limhang zor ding in sual a phawtu pawl kha kan doh hna i hi hnu ah Social Media cung le mipi sin ah chim/ṭial lo ding le CDF-Mindat lawng Mindat peng hriamtlai phu a si tiah an ṭial.

Phu he aa pehtlai mi zei bantuk thil hmanh CDF-Mindat page le Brigade Commander zung, Second Brigade Commander zung  le rianngeitu pawl sin ah cakuat khawh a si tiah theihternak an tuah.

Na ruahning rak langhter ve.. (Leave a comment)

%d bloggers like this: