AA Ralkap Nih Phung Ning Loin Khua Mi Hna Sinah Ei-din Facang Hna An Hal Hna
Paletwa Ralzam/CHRO
TCP- Hakha| 24 September 2020| Chaklei Paletwa khua mi hna sinah AA ralkap hna nih phung ning loin ei-din facang an hal hna tiah thawng kan theih.
“ Paletwa cu lam pawl phih dih asi caah ei-din hna an har i thilman an man zong a fak taktak. Khua mi hna nih facang tun khat ah 75,000 MMK in an cawk. Asinain, AA pawl an phak tikah inn khat ah facang tun tan ceu in kan zuarh u an ti hna. AA ralkap pawl nih an pek taktak mi hna cu tun khat ah 40,000 lawngin an cawk hna,” tiah Paletwa lei min langhter duh lo pakhat nih The Chinland Post ah a chim.
AA nih khua mi hna sinah hitin phung ning loin thil an cawkmi hi a voi tam cang tiah “Hi bantuk thil a can hi atu lawng in a thokmi asi lo. 2015 hrawng in asi cang. Khua mi nih facang an pek hlei hna ah, porter in an lak hna i an duhnak hmun tiang an phorhter hna. AA cu kuan le zen, meithal he an si tikah khua mi nih an tih hna. Cu kong cu thawngpang zong in kan tial ngam lo. Kan tial sual ahcun khuami tu kha tuk velh an tong than,” tiah a chim chap.
About The Author
