Avoi 4nak WPC Ah Aa Pai Dingmi Naga Pathawng Visa An Lut Cang Lai

Tawk Tling Thang| 2019 June 13| July 13 ah tuahdingmi avoi 4nak World Paih Championship (WPC) paih zuamnak ah Naga champion le ramkip champion an sawm cang hna, hmaizarh khi visa an lut cang lai tiah WPC sin in thawng kan theih.

Hi kong he pehtlai in WPC haotu Pu Ang Cung nih, “Avoi 4nak WPC paih zuamnak cu sunglawi taktak in a ralaimi July 13, Indianapolis ah kan tuah lai. Nagaland state paih thiambik le paih thawng bik a simi an champion le a changtu telh in tuanvo ngeitu upa pathum, an zapi minung 5 kan sawm cang hna. Rat ding zong timhtuahnak an ngei cang. An ram cozah le mizapi zong nih tha an pek ngai hna. Hmaizarh chung ahkhin visa an lut lai i an ngah ahcun tutan paih zuamnak cu Chinmi nih kan tuahmi vialte lakah a sunglawi bik, rumra ngei bik le huham a ngei bikmi paih a si lai. Zeicah ti ahcun anmah lawng si lo in ramkip in champion a cotu Lai pathawng vialte zong kan cah dih hna caah” tiah The Chinland Post ah a chim.

Naga champion, a changtu le Rung Lian Ceu

Middle weight aa pai ding ah Newzealand in Ram Hei (Hakha Khuahlun a si,  minung 8 nih an zulh  lai), Heavy weight aa pai ding ah Sweden in Sang Bik Hmung (Phai khua), Middle weight aa pai ding ah Denmark in Ro Sang Bik (Khuabung khua) le Heavy weight aa pai ding ah Van Ceu Lian, Middle Weight aa pai ding ah Canada in Cia Khar (Hakha Khuahlun_anih hi cahmi a si lo caah amahte in vanlawng ticket aa liam lai). A dang hi cu cahmi lawngte an si. Vanlawng ticket man WPC nih hnarcheu an liampiak hna lai tiah WPC haotu sin in kan theih.

Naga paih champion le a changtu

Perth Western, Australia ah February 16 i tuahmi Chin Miphun Ni paih zuamnak ah Hakha Khuahlun in Lai Ram Ceu nih zatlang le zuamcawh kemh in champion a co. Western Melbourne, Australia ram, February 16 ah tuahmi Chin Miphun Ni paih zuamnak ah Thantlang peng, Hmawngtlang khuami Chan Cung Lian nih zatlang le zuamcawh he bual a co. 2019 February 16 ah tuahmi Dallas, Chin National Day (CND) zuamcawh paih ah Uk Ling Thang nih bual a co tiah kan theih.

“Lai pathawng Rung Lian Ceu cu anmah Naga ram paih zuamnak ah anmah paih zulhphung ning cun a sung, pathumnak tiang lawng a ngah. Asinain, aa paihmi zoh tikah thal thlak in cun an tei lo. Tutan cu kanmah Lai paih zulhphung ningte bak in an i paih lai caah zeitluk in dik zoh an nuamh te hnga, khuaruahhar khi a si ko lai. Naga kan unau paih thawng hi pound 160 cung an si caah annih cu heavy weight ah an i pai te lai” tiah Pu Ang Cung nih a biapeh ah a chimchap.

Ro Sang Bik

“Tutan Naga paih ah champion co ding in zakhat ah zakhat bak kaa tinh in kaa ruahchan ko nain ka ngah lonak a ruang bik cu kan paih phunglam aa khah lo ruang ah a si. Kanmah Lai paih phunglam in i pai usihlaw a kan tei lai lo” tiah Naga paih zuamnak a dih cangka The Chinland Post he biaruahnak he Rung Lian Ceu nih a rak chim.

Uk Ling Thang

Pound 160 tang a simi Middle Weight caah aa pai ding minung 16 tiang an cohlan. Champion laksawng cu $5000 le a pahnihnak laksawng hi $2000 a si lai. Cu bantuk in Heavy weight caah aa pai ding minung 32 tiang an cohlan i champion laksawng cu $8000 le champion taisawm pek a si lai.

Sang Bik Hmung

Middle Weight ah special in World Champion cuhnak program zong a um chih lai i MMA-One Championship ah World Champion taisawm a cotu Aung La Nsang zong nih a telpi hna lai tiah kan theih.

Lai Ram Ceu

March 7, Nagaland state, Kohima ah tuahmi avoi 12nak Open paih zuamnak ah Rung Lian Ceu nih pathumnak le paih thiam bik laksawng phun hnih a co. Pathum laksawng hi anmah India tangka in Rs. 100,000 le Paih thiam bik (the best tactic wrestler) laksawng ah Rs. 10,000 a co. Kawlram tangka in cun Ks. Sing 22 (2,200,000) tluk a si.

Hika ah Nagaland i Rung Lian Ceu aa paihnak video Lian nih a thlakmi zoh khawh a si.

 

Champion cotu hi Menuosetuo Yiese a si, Rs. 200,000 a co. Pahnihnak hi nikum champion Venuzu a si, Rs. 150,000 a co. Tutan avoi 4nak WPC paih ah an sawmmi hna cu anmah pahnih hi an si.

Leave a Commnet

%d bloggers like this: