Bangladesh ramri ah a ummi SAC ralkap sakhaan AA nih a lak
The Chinland Post | 2022 September 1 – Rakhine ram, Maungdaw chaklei, Myanmar-Bangladesh ramri mengtung 40 pawng i SAC ralkap sakhaan cu kan lak khawh tiah Arakan Army (AA) nih August 31 zaanlei ah a thanh.
Cuka pawngkam ah kaphih karlak kahdohnak a chuah hi August 2 in aa thok i thlakhat deng a rauh hnuah kan lak khawh tiah a chim.
Kahdohnak chungah SAC ralkap nih nikhat ah hriamngan voi 400 hrawng kah a bawmh lengmang lengah Jet Fighter le Helicopter hna in bom a thlak lengmang bu ah AA ralkap nih mengtung 40 pawngah a ummi SAC ralkap sakhaan cu August 31 zinglei sml 9:12am ah an lak khawh hi a si tiah a langhter.
Cun 2022 August 28 zongah SAC LIB 377, LIB 378, LIB 540 hna nih Mrauk-U peng khuate hna ah hriamngan a kah lengmang i kum 5 hngakchia Myat Lin Thu telh in U Aung Thein (kum 38), Daw Aye Yin Nuh (kum 69) hna cu hriamngan ruangah an nunnak a liam i minung 9 an i hliam tiah AA nih a thanh.
Mengtung 40 pawng kahdohnak ah palek bawi Su Su Piang telh in SAC kuttang 19 an thi i AA lei in hliam a tuarmi zong an um tiah a thanh nain AA lei pa zeizah an i hliam timi cu a langhter lo.
SAC ralkap a thimi ruak pawl tampi zong sakhaan chungah an phum tami kha kan hmuh khawh tiah an ṭial.
Rakhine ram caah kahdohnak a tuahmi ralkap hna le a nunnak a thapmi hna zong upatnak kan in pek hna tiah AA nih a langhter chih.
About The Author
