Breaking News: Hakha Ah Inn Pahnih Le Dawr Pali A Kangh Pin Ah Minung Pahnih An Tlau

City Hunter| 2018 May 31| May 31 zan, zinglei suimilam 2:00 hrawng, Hakha lamtonnak (laansone), Dawrthar sang ah inn pahnih le dawr pali a kaang i an ciam dih. Cu pin ah minung pahnih an umnak hngalh loin an tlau. Mei nih a kaang chih hna a si sual hnga maw tiah khuami le chungkhar lungrethei vansang in an um tiah theih a si.

Van Siang Mang pa nih, “Kei hi Khuahlun ka riak, inn a kangh tiah thawng a kan thanh i ka lau tuk i ka rak kai zokzok. Inn ahhin kan pi he hin minung pahnih lawng an um. Na pi (Ni Ceu Nu) hi aho nih khuazei ah a um timi an hngal lo i kan lungre a thei tuk. Mei nih a kangh i maw a si hnga” tiah The Chinland Post ah a chim.

Inn a kaanghnak hi Hakha Dawrthar sang, lamtonnak hmun, Bogyoke lampi cung ah a si. Inn a kaangmi cu Wai Han Nu te inn (Pale Store), Van Siang Mang Pa inn le dawrkhaan te lawng sakmi inn an si. Inn a kaangmi chung ahhin dawrkhan pali aa tel. Van Siang Mang pa inn le Wai Han nu te inn cu a ciam dih ti tluk a si. Pu Ni Cung inn (Lairam Canphio Dawr) zong vampang vialte mei nih a hrem, a kangh ve nain khuami le meithat motor nih an hmih manh than. Pu Sang Cung inn zong a hrem pah nain meithat motor nih an ven i an phelh manh than.

Van Siang Mang pi- Pi Ni Ceu nu le Wai Han Nu hi atu thawngpang kan tial tiang ahhin khua zei ah an um an hngal rih hna lo. Aho hngalh lo in hmundang ah maw an zaam? Mei nih a kangh chih hna hnga? timi fiangte in hngalh khawh an si rih lo. Pale store dawr ngeitu Sui Sui zong sii-inn ah an kalpi tiah theih a si.

“Wai Han Nu hi cu mei akangh ka ah innchung ah an hmuh nain innchung lei ah a lut than. Cu hnu cun an mui an hmu ti lo, khuazei a um zong an hngal kho ti lo. Cu bantuk in Pi Ni Ceu nu zong hi a chungkhar nih siseh, khuami le sangmi zong nih a umnak hngalh a si lo. Mei nih a kangh chih theu hna lai ti ruah an si. Cun Pale store dawr ngeitu Sui Sui kha sii-inn ah an kalpi. Midang cu aa hliamkhuaimi an um le um lo fiang in kan hngalhmi hna an um rih lo. Thlacamnak in bawm cio hna usih” tiah Hakha khuanu khuapa in Pu Ral Kham nih The Chinland Post ah a chim.

“Innkanghnak ah a ummi Pi Ni Ceu Nu le Wai Han nu hi inn i a ummi an si ko caah an umnak hngalh a si lomi hi mei nih a kangh chih hna i a si kho men. Cuti lo ahcun minung pakhat khat tal nih an mui an hmuh hna nain an umnak an hngalh ko hna hnga” tiah min langhter a duh lomi sang upa pakhat nih The Chinland Post ah a chim.

Mei hi a kangh ka in meithat motor an ra ko nain a kanghning a fah tuk caah an hmit kho zokzok lo. Meithat motor a rami hi 8 hrawng an si. Hakha penguk zung lutlai siseh, Chin ramkulh hluttaw zung upa, Chin ramkulh minister le Chin cozah upa hna zong mei kanghnak hmun ah an rak chuak colh ve.

Mei hi khuazei in dah a kangh le zeitindah a kangh ning a si timi fiangte in hngalh khawh rih a si lo. Khuami le sang upa chimning ahcun Van Siang Mang pa te inn in mei kangh hi i thawk sehlaw a dawh. Asinain, cu zong cu biafiang a si rih lo.

Atu thawngpang kan tial suimilam 5:00am tiang ahhin mei hi mit dihlak in an phelh kho rih lo. Meici le meitil pawl an dai taktak rih lo nain a kaang thluahmahmi tu cu an phelh khawh cang.

Tukum chung lawng ah Hakha khuapi chung ah innkangh voithum renglo a chuak cang i atu hi avoi 4nak hrawng a si cang tiah kan theih.

Na ruahning rak langhter ve.. (Leave a comment)

%d bloggers like this: