Buanlung khua ah hriamngan a puah caah kum 6 hngakchia 2 an thi, 1 aa hliam
The Chinland Post | 2022 October 20 – Chin ramkulh, Senthang peng, Buanlung khua October 19 zaanlei sml 3:00pm hrawngah hriamngan a puak i sianginn in a rak ṭin liomi hngakchia 2 an thi, 1 fak piin aa hliam tiah thawng theih a si.
Hriamngan a puah ruangah KG-2 a kai liomi kum 6 hngakchia pa 2 an nunnak a liam i anmah he sianginn a ṭinṭi mi kum 6 hngakchia nu 1 fak piin aa hliam.
“Kum 6 hrawng KG-2 hngakchia an si caah tuan tein an ṭinter hna. An ṭinnak lam ah hriamngan a puak. An pawng te ah a puah caah pate pakhat cu hriamngan nih a khen hnu sml cheu hrawng ah a nunnak a liam. A hma fak tuk in a tuarmi hngakchia pakhat zong a nunnak a liam ve. Hngakchia nute cu sizung ah an kalpi” tiah Buanlung siangcachim pakhat nih Khonumthung Burmese ah a chim.
A nunnak a liammi hngakchia pate 2 cu James Siang Za Uk (kum 6) le Henry Bawi Za Lian (kum 6) hna an si i hliam a tuarmi hngakchia nute cu Nancy Ca Len Par (kum 6) a si.
Buanlung khua cu Senthang peng ah a um mi a si i Hakha khua in meng 20 aa hlatnak ah a um.
Khuachung i hriamngan a puah lioah Senthang peng le khua pawngkam ah kahdohnak a um lo tiah khuami hna nih an chim.
About The Author
