Buddhist Biaknak Puai Ah Cozah Zung Lutlai Pawl Hramhram In Kal Ding Chinram Cozah Nih Ca An Pek Hna

Salai Ngun San Aung| 2018 July 24| Chin ramkulh cozah phu nih July 27 Pyidawtha sang Phungki inn ah tuah dingmi Buddhist biaknak puai pakhat -Wuasu Tinkaan puai ah Chin ramkulh cozah zung lutlai vialte bau lo tein nan kai lai tiah ca an pek hna tiah kan theih.

Cu an ca pek mi ah cun, “Chin ramkulh cozah phu hruainak in 2018 July 27, Pyidawtha Phungki inn ah tuah dingmi Wuasu tinkaan puai ah ah bau lo tein nan rak i tel naklai kan in sawm hna” tiah an tial.

Hi kongah Chin Human Rights Organization i Program Director a tuan lio mi Salai Za Uk Ling nih, “tu bantuk in Cozah phu nih bau lo in kai ding an timi hna nih a langhter mi cu ramkulh cozah nih an ngeihmi mumai phungphai ah biaknak zalonnak a um lo i biaknak pakhat khat kha mithmai tha pek in tanhhleinak a um rih timi a si. Ram pumpi huap kahdaihnak ding hnatlaknak ca minsen thut zongah Secular State (Biaknak ah hram a bunh mi ram) kong hi an mumai pakhat a si. Asinain cucu Chin ramkulh ah atak in an hmang lo ti kha a lang. Chin ramkulh cozah hruainak in tuahmi an ti tikah a langmi cu Chin ramkulh cozah phu chung ah Khrihfa an tam deuh bu in hi bantuk an tuahmi hi cunglei hna in hneknak a um sual maw ti mi ruah lo awk a tha lo. Cun hi bantuk cu biaknak kongah hramhram in hnek a si caah nuhrin covo an buar a si. Cun hi puai kal dingin a alhnial mi hna an um le cozah nih zeitin in an ti sual hna ahcun kannih cu nuhrin covo leikap in kan aupi peng ko hna lai. Cun ahohmanh nih an alhnial lo zongah hi bantuk kong cu kan au peng ko lai” tiah TCP ah a chim.

Wuasu Tinkaan puai tuahnak ding committee ah lutlai pathum lak i pakhat a si vemi Chin ramkulh Hluttaw Vice Chairman U Aung Than nih, “kei zong Nayaka ah thim ka si nain khual ka tlawn kar ah meeting an rak tuah i zeitin ca an tial le an pek hna ka hngal ti lo. Atak ahcun rampi upadi he zohchunh tik zongah aa kalh tiah ka ruah. Biaknak kong ahcun ahohmanh hramhram in i hnek phung zong a si lo i hnek khawh zong a si lo. Cu nakin hi bantuk puai a um caah rak i tel ve uh tiin sawm a za ko. Asilole minung hna an tlawm si le mi kan tlawm deuh caah rak kan telpi cio dingah kan in nawl hna tiah nem tein an ti ding a si. Bau lo hrimhrim in nan i tel lai tibantuk cu aa dawh lo. Buddhist tam nak Kawlram te hna ahcun sisehlaw aa zia deuh. Hakha hna i mah bantuk tuah cu aa dawhtlak lo tuk. Cozah nih zei biaknak paoh aa tluk tein a zoh lai i puai zong a herh ahcun a tuahpi ko hna lai asinain biaknak aa dang mi kha hramhram in tel dingah hnek phung a si lo” tiah TCP ah a chim.

Atu bantuk Buddhist biaknak puai lawng si lo in Buddhist biaknak puai pakhat a simi titoih puai an tuahning zong ah hramhram hnek bantuk in bau lo tein nan kai hrimhrim lai tibantuk a um rih theu ko. +++

Photo: Hmanthlak hi aa tlaknak in kan taarmi a si. Vice President Henry Van Thio a tlun lio ah ramkomh minister (Buddhist) pawl phungki hmai ah an kun lio a si. laithil aa hrukmi khi Laimi an si lo, Kawl an si. 

Leave a Commnet

%d bloggers like this: