CBC USA Nih US$ 5000 A Bawmh I HBA Worship Band An Dirh Colh

City Hunter| 2018 February 8|CBC USA nih ringawn (music) lei thilri cawknak dollar 5000 bawmhnak an pek hnu ah HBA (Hakha Baptist Association) nih ringawn lei thanchoternak le PATHIAN thangthatnak caah ti in HBA Worship Band an dirh colh tiah kan theih.

HBA Youth Department Secretary Pastor Cung Lian Thawng nih, “CBC USA youth department nih ringawn lei thilri cawknak caah dollar 5000 an kan bawmh. Atu hi ringawn (band) tlingte in thilri zong kan cawk dih cang. Ringawn lei thanchoternak le PATHIAN thangthatnak caah HBA worship band zong minung 35 hrawng in kan dirh colh. Atu hi zan fatin HBA worship band phu nih zan fatin hlacawnnak ah ringawn kan ngeihmi pawl zong an hman thluahmah cang. Hi bawmhnak hi anmah CBC USA an rak tlun lio hrimhrim ah bawmhnak kan halmi hna a si” tiah TCP ah a chim.

HBA worship band cu hlasatu minung 25 le ringawn tumtu minung 8, an zapi minung 35 tluk in an dirh. HBA ramchung, church kip le association kip in minung 3 asiloah minung pakhat cio an i tel. Hi worship band hruaitu deuh ah thimmi hna cu; Saya Mang Lian Chawn, Pastor Chan Hnin Thang, Saya Kap Lian Thang an si tiah kan theih.

“Atu band worship band cu, biaknak lei puai kan ngeih tikah felfaite in ringawn le hla lei a kan hruai khotu phu siding, Choir- hlarem lei a thanchotertu phu siding, PATHIANG thangthatning a tungmertu le a thanchoter khotu siding, hmailei ah CACC ramchung tiang hman awk le bochan awk a tlakmi worship phu siding hi kan i tinhmi le kan i hmaithlakmi an si. Mino ca hrimhrim ah PATHIAN kan thangthatning (praise and worship) hi thlenremh le thanchoter a herh cang. Cun HBA nih kum fatin ringawn tling (guitar, drum, keyboard tibantuk) tum cawnnak training kan tuah lengmang. An cawn i an thiam tuk ko nain a hmannak an ngei lo, an cawnnak lawng in a dih theu. Cu hna pawl ca hrimhrim ah atu bantuk in worship band phu kan dirhnak le thilri tlingte in kan chiahnak hi a si. Ringawn tlingte in hlacawn le a phu in ringawn tling tum a duhmi nih HBA ah rak tum cio khawh a si” tiah Pastor Cung Lian Thawng nih a biapeh ah a chimchih. ++++

Na ruahning rak langhter ve.. (Leave a comment)

%d bloggers like this: