CCSN Nih Mino Le Nu Thanchonak Rian Cawnnak A Tuah I Minung 37 Nih Rian An Hmuh
The Chinland Post| 2019 July 5| Kum 2019 January in June tiang, Chin Civil Society Network (CCSN) cu GRET le LIFT bawmhnak hmang in Hakha peng mino le nu hna thancho nak riantuan mi ah minung (150) nih thiamnak an hmuh i minung (37) nih rian an ngei, minung (91) nih midang thathnemnak caah rian an tuan tiah kan theih.
Nu thanchonak caah kut zungthiam cawnnak (chapiat phun phun, thlalang tawlnak, ti hman hau lo kut tawlnak, maalit sii, hmai ngoternak le thil putnak tawng tbk.,) a phun phun ser cawnpiaknak an tuah i Hakha peng khuate in minung (54) le Hakha in minung (27) zapi fonh minung (81) nih thiamnak an hmuh. Minung (26) nih an cawnmi hmang in pehzulh in rian an tuan i minung (49) nih an cawnmi thiamnak cu inn pa chak thlang le hawi le sin ah chimh cawnpiaknak an ngei kho.
CCSN le GTI Hakha bawm in Cycle Remh le Electric Mei Ser cawnnak voi (3) veve tuah a si. Cawnnak ah a kai khomi hna cu Hakha peng khuate in minung (40) le Hakha in minung (26) zapi fonh (66) an si. Cycle Remh cawngmi minung (21) le Electric Mei Ser cawngmi minung (45) an si.
Cycle remh cawngmi chung in minung (1) nih a mah te in Cycle remhnak dawr a tuah khawh i minung (15) hna nih cun mi dang Cycle a rawkmi an remh piak ve hna. Electric mei ser a cawngmi hna chung in minung (6) nih rian an hmuh i minung (27) nih a herh ning in mi dang electric mei an serkpiak hna.
CCSN cu Mino hna nih rian an ngeih khawhnak dingah riantuanmi a si bantuk in mino caah rian kawl piak le rian soknak ah a herhmi vialte tlamtling te in kan bawmh hna. Minung (4) nih NGO ah rian an hmuh. Hakha CSO vialte hmun khat te ah riantuan ti khawhnak ding ah policy ngeih a herh caah CCSN tawlrel pi nak in Hakha Civil Society Network policy kan ser i cu policy cu cauk in chuah a si cang tiah tuanvo ngeitu upa hna sin in kan theih.
About The Author
