CDF-Mara min aa bunhmi hriamtlai phu nih Mara hmunhma chungah an buarmi sualnak cheukhat cu mipi theih ding in MATC nih a langhter

The Chinland Post | 2022 September 1 – Chin ramkulh, Mara miphun pawl an umnak Mara hmunhma chungah Mara miphun min CDF-Mara min aa bunhmi hriamtlai phu nih hriam thazang hmang in Mara hmunhma chungah an buarmi sualnak cheukhat cu mipi hna theih ding in Mara Administrative Territorial Council -MATC nih a langhter i atu bantuk in sual a buarmi hna cu mipi he fonh in dantat an si lai tiah September 1 ah MATC nih a thanh.

CDF-Mara hriamtlai phu nih 2022 March chungah MATC mi sawmnak meeting khaan chungah hriam tling le thazang tampi in an rak lut i MATC hruaitu le chungtel pawl cungah an kut an thlak, 2022 June thla chungah Lailenpi ah a ummi Catholic Church zung ah hriamngan in an lut i zung chungah a ummi Pastor le rianṭuantu pawl an tlerh hna, mipi an um lonak khua le khua karlak ah hriam thazang hmang in khuami hna tangka an hal hna, mipi cungah an ṭhawnnak a langh khawhnak hnga Mara ramchung khual tlawnnak ticket pawl kha a man fak piin an zuar i a caw lomi cu khual tlawnnak nawl an pe hna lo, Paṭhingṭala le Tio tlang chungin mipi pawl hriamngan in tinh hna i an tlerh hna, mipi mawṭaw tawh pawl, rianṭuannak mawṭaw tawh hna chut i tangka tampi in an hlamter ṭhan hna, Lailenpi khuachung Pastor 2 le mipi pakhat cu an tuahmi sualnak pawl nan thanh tiah tlaih in kan in thah hna lai tiah an tlerh hna, CDM a tuahmi chungkhar hna kha luhhnawh in tlaih le velh, peng uknak rian a bawmtu le khua uknak committee chungtel pakhat tlaihnak tiin sualnak tampi an tuah tiah a langhter.

Mara miphun hrambunh in dirhmi CDF le MDF tiin hriamtlai phu 2 an um tiah theih a si.

Atu bantuk in mipi duhnak zul loin thiltuah pawl cu sual kan phawt i cubantuk thil a tuahmi pawl cu mipi he bawm in a ziizut an si lai. Cuti kan tuahmi hi kan miphun he aa pehtlaimi a si caah kanmah he direct aa pehtlai lomi phu pawl teltumnak kan duh lo tiah an langhter.

Mara mipi hna nih Mara hmunhma chungah Federal Democracy phung hram a bunhmi uknak ser le hmunhma a hrawktu thil vialte khamnak caah MATC lawng hi tling tein riankhinh a si tiah cathanh ah an langhter.

Na ruahning rak langhter ve.. (Leave a comment)

%d bloggers like this: