CDF-Mindat nih a tlaihnak hmunhma chungah zuu, beer phorh khawh a si lo tiah ralrinnak a pek
The Chinland Post | 2022 August 8 – Chin Defense Force-Mindat nih a tlaihnak hmunhma chungah a umkalmi mawṭaw hna nih zuu, beer le zeibantuk riithainak thilri poah phorhnak nawl a um lo tiah CDF-Mindat nih ralrinnak a thanh ṭhan.
Zatlang buainak le sualnak pawl zorter ding caah zuu, beer phorhnak nawl le zuarnak nawl cu Mindat mipi uknak nih a tlaihmi hmunhma chungah tuah lo ding in a luancia February thla ah cathanh chuah a si cang.
Cu hnuah a thli tein phorh le zuar a si rih caah atu bantuk in ralrinnak thanh ṭhan hi a si.
Atu bantukin rithainak kham a si hnuin zatlang buainak le i tukvelhnak a zor tuk tiah Mindat mipi uknak phu rianngeitu nih The Irrawaddy ah a chim.
Mindat peng ah Mindat khachung dah ti lo adang hmunhma vialte cu CDF-Mindat nih a tlaih i cu hmunhma pawl ah Khuaung-yi le wine dah ti lo adang zuu, beer vialte cu phorhnak nawl a um lo bantukin dawr zongah zuar khawh a si lo.
