CFB General Secretary Pu Chan Lian Cu Pu Van Awi Nih A Rian A Chawn Cang

TCP-Online| 2018 March 17| Chin Funtomnak Bu (Kalay-Kabaw) rak dirhkaa in General Secretary a tuanmi Pu Chan Lian cu CFB rian ah aa din cang i amah zaka ah Pu Van Awi cu CFB General Secretary ah thim a si cang ti thawng kan theih.

Hi kong he pehtlai in GS hlun Pu Chan Lian nih “Minung pakhat nih Khrihfabu le Luhmuhzi (Social) lei ah hin kum saupi tlaih a tha lo ti ka ruah. Keimah hrimhrim nih Nomination Committee ah kum 7 leng a tuan cang ka si caah ka min cu rak telh ti hlah uh tiah ka nawl hna. Nomination committee zong an lung tling ve i cuticun ka rian aiah Pu Van Awi cu GS ah an thim” tiah The Chinland Post ah a chim.

CFB nih Committee member thar thimnak an tuah cu March 3 ni Tayagone khua ah an tuah. Hi ah hin Committee member pawl thlennawnnak ah General Secretary lawng a si i a dang paoh cu a tuan thingmi hna nih an tlaih rih ko ti zong kan theih.

Chin Funtomnak Bu (Kalay-Kabaw) cu 2011 kum December 28 ni ah Kalay-kabaw um Laimi upa hna tel in minung 115 leng nih rak dirhmi bu a si. Hi bu rak i thok kaa hin The Chin Times ti cazual chuahnak in rak thokmi bu a si. Cun Tho Puai zong kum chiar nawn an tuah i 2012 kum lio ah Kyarinn, 2014 Khampat le 2017 ah Tanphu khua hna ah hlunghlai ngai in an rak tuah khawh.

Hi bu cu 2014 kum ah cozah nih theihhngalhpinak Register zong a pek hna i motor zong an rak cawk khawh. Kum chiar nawn in thal caan ah Laica cawnnak zong an tuah i cu an tuahmi cu Kalay peng khua chung vialte le Gangaw peng tiang in an tuah khawh tawn. Ti ngah a harnak hmun simi Kantaya, Tanphu le Hmandaw khua hna zongah US lei bawmhnak tikhor an tuahpiak khawh cang ti kan theih.

“Tangkaa zeihmanh ngei lo bakin The Chin Times Media tein kan rak thok tikah Rawn chin ram vialte ah Lai holh in Media hmasa bik zong kan si. Atu ah inn hmun zong Taungzalat sang ah kan cawk khawh cang. Keimah ka chuah ah hin motor 6 le tangkaa zeimawzat zong ka chiah ta manh hna. Ka chimcia bang khan minung pakhat nih Khrihfabu le luhmuhzi rian hi sautuk tlaih a tha lomi a si. Keimah zong hi pehzulh in tuan duh rih ko sehlaw ka tuan khawh ko hnga. Nain, minung pakhat nih sau tuk in mahbantuk rian hi tlaih a that lo ti ka theih caah ka chuah takmi a si” tiah Pu Chan Lian nih cun The Chinland Post ah a chim. +++

Na ruahning rak langhter ve.. (Leave a comment)

%d bloggers like this: