Chin, Kachin, Karenni le Karen ram hna ah vanlei kahdohnak tuah ding Special Operation an thawk
The Chinland Post | 2023 February 15 — Hramhram in uknak a latu SAC nih Chin ram, Karenni ram, Kachin ram le Karen ram hna ah vanlei in bom thlak ding Special Operation an thawk cang tiah theih a si.
February 14 zaanlei thawk in Chin, Kachin, Karen ram hna ah vanlei in bom thlak ding tiah timhtuahnak an ngei i Pathein vanlei ralkap, Namhsan vanlei ralkap, Naypyitaw Ayelar (အေလာ) vanlei ralkap, Mandalay dataoo (တံတားဦး) vanlei ralkap, Hmawbi vanlei ralkap, hna nih February 14 thawk in hmakhat te ah bom an thlak tiah theih a si.
Min Aung Hliang nih PDF le CDF an karhnak a ruang bik hi tlangcung hriamtlai phu EAOs an si tiah a chim i tlangcung hriamtlai pawl kan hrawh cikcek hnu lawng ah PDF le CDF pawl an rawk lai tiah a zumh caah Special Operation a tuahnak hi a si.
SAC nih Chin ramkulh CNF Headquarters siseh, KIA pawl hram an bunhnak Headquarters pawl siseh, KNU hram an bunhnak Karenni ram Headquarters le Karen ram pawl ah bom thlak ding in timhtuahnak a um rih tiah theih a si.
Special Operation caah kahdohnak vanlawng pawl a si mi, Yak-130, Su-30, FTC 2000 G, A-5 hna an hman lai tiah theih a si.
SAC nih uknak caan a sauh chap mi thla 6 chung ah tlangcung hmunhma hna ah kahdohnak a fahter chin lai i Martial Law an thanhnak peng 37 i hriamtlai phu pawl hrawh cikcek ding timhtuahnak a ngei tiah theih a si.
Naypyitaw in အေလာ vanlei ralkap le Mandalay in တံတားဦး vanlei ralkap hi CNF Headquarters bom rak thlak lio ah an hman mi hna vanlei ralkap an si.
About The Author
