Chin ramkulh ah ngandamnak lei conghhramhnak a lamkip in a ṭumchuk

0

The Chinland Post | 2023 February 8 — Ramchung buainak a fah khunnak hmunhma pawl ah cozah nih ngandamnak lei a zohkhenh ning a zapi ngawt in a dir dih. A hlei in, nau pawi lio le bawhkeuh a thi mi an tam khunnak Chin ramkulh ah ngandamnak lei zohkhenhnak a rawh dih caah, thinphang dirhmun a si tiah mipi lei Doctor nih an chim.

Chin ramkulh ah ngandamnak zung pawl, siikhaan pawl ah ngandamnak lei rianṭuantu an chanbau bantuk in, sii-ai bawmhnak a um ti lo tiah mipi lei ngandamnak phu nih an chim. SAC chan ah cozah nih ngandamnak lei zohkhenhnak rian vialte a thlau dih tiah Chin mipi lei Doctor nih VOA ah a chim.

Chin ramkulh milu in kan tuak a si ahcun, Chin ramkulh hi adang hmunhma nak in nau pawi lio nu le bawhkeuh a thi mi an tam deuh. Cucaah ahlan cozah nih khuate lei ngandamnak zohkhenhnak kha a rak kauh. Hngakchia a thi mi tlawm deuh hna seh tiah ni 1,000 program zong a rak tuah. Atu ahcun cubantuk program pawl a dir dih tiah a chim.

Chin ramkulh ah 2020 thawk in nau pawi lio nu hna nih sizung le sikhaan an hun hman thluahmah. Mah tein a ngei mi hna zong sprit le operation tuahnak thilri pawl ngandamnak zung nih an bawmh hna. Atu cu mah bantuk kha zeihmanh a um ti lo. Ralzaam dirhmun le tlik le zaam bu in nau ngeih a si caah nau a thi mi an um fawn.

Khuapi sizung le siikhaan kal duh tik ah lam ah check a tam caah umkal a har bantuk in, nau pawi lio le hngakchia zohkhenh a har chin tiah mipi lei Doctor phu nih an chim.

Chin ramkulh ah ngandamnak lei a ṭuan kho ding ramdang phu pawl zong SAC nih a kham hna. Cheukhat phu hna cu sii bawmhnak pe kho ti lo in mizaw ṭhialkamnak lawng an tuah khawh cang. Cucaah 2023 chung cun atu bantuk dirhmun hi a zual chin kho mi a si tiah Chin mipi lei Doctor hna nih an ruahdamh.

About The Author

Na ruahning rak langhter ve.. (Leave a comment)

%d bloggers like this: