Chin Ramkulh Ah Tahfung A Tling Lomi Sianginn Pasarih Chekfelnak An Tuah Than

City Hunter| 2018 June 26| Chin ramkulh ah Private company pawl nih sakpiakmi sianginn pasarih cu rikhiahmi tahfung an tlinh lo caah Chin ramkulh cozah bu nih chekfel thannak an tuah tiah theih a si.

June 21 ah Chin ramkulh Paletwa peng, Namchaung-wa khuachung ah rikhiahmi tahfung a tling lomi sianginn pakhat cu Chin ramkulh Chief Minister hruaitumi cozah bu nih zohfelnak an va tuah. Mah lawng si lo in a dangdang sianginn tahfung a tling lomi sianginn pawl zong Chinram cozah bu nih chekfelnak an tuah than i a herhmi tawlrelnak an tuah.

Hi kong he pehtlai in Chin ramkulh Sipin le Electric minister U Soe Htet nih, “Atu bantuk tahfung tling lomi an sakmi sianginn cheukhat cu thinghak, tlorthing an hman khawh lo ruang ah siseh, foundation tuahnak caah a herhmi thetse, mirang vawlei tibantuk a that lo caah a si. Thing hi Kawlrawn lamhlat pi ah va phorh a hauh tikah phorh man le budget aa remchunh khawh lo ruang ah tualchung thingrua an hmanmi ruang ah a fek lomi a tam” tiah The Chinland Post ah a chim.

“Chin ramkulh chung ah sianginn zapi 1400 renglo a um. Atu NLD cozah chan avoi 1nak bik budget kum ah Chin ramkulh chung sianginn 121 kan sakpiak hna. Avoi 2nak budget kum ah sianginn 58 kan sakpiak khawh cang hna. Atu thlaruk budget chung ah sianginn 92 sakpiak rih ding in timhtuahnak kan ngei. Asinain hi chung ah sianginn 9 cu kan hnonpiak than hna, kum dih budget lawng ah sapiak an si te lai. A cheu cu a thawk cangmi zong an um i 10%, 15% tibantuk a tuan cangmi zong an um” tiah Chin ramkulh Social Affair Minister Pu Pau Lun Min Thang nih The Chinland Post ah a chim.

Na ruahning rak langhter ve.. (Leave a comment)

%d bloggers like this: