Chin Ramkulh Chief Minister Thlennak An Tuah Kho Men
The Chinland Post | 2023 August 7 — Naypyitaw ah phuan a tong mi Chin ramkulh Chief Minister Dr. Vung Suan Thang cu SAC hruaitu Min Aung Hliang nih a rian in an phuah kho men tiah Chin ramkulh SAC cozah he aa naihniam mi nih Mizzima ah an chim.
“Chin ramkulh SAC cozah phu chung ah thlennawnnak a um ve. Ahlan ahcun Minister 2/3 hrawng thlennak a um kho men tiah thawng a leng nain atu ahcun Chief Minister kha Naypyitaw ah an phuan tiah thawngpang a leng. A biapi in Budget tawlrelnak ah tlukruannak a um lo. Cun Tender rian pawl kha Tedim peng pakhat lawng ah a tuahter hna i a tupa he bawm in Company 3 hrawng an tlaih hnu ah Tender a zapi in anmah nih an ngah caah company ngeitu cheukhat nih Naypyitaw ah an phuan” tiah Mizzima ah a chim.
Peng chung cinthlak le zuatkhalhnak pawl ṭhanchoternak caah Fund 10 Billion Chin ramkulh nih a hmuh. Cu Budget kha Chin ramkulh chung pengkip ṭhencheunak ah tlukruannak a um lo tiah theih a si.
“Budget ṭhencheunak kong he pehtlai in hmunhma a buai khun nak Mindat, Thantlang peng hna ahcun ṭhanchonak rian ṭuan khawh a si lo. Budget a zapi cu a chuahsemnak Tedim peng ah a hman dih. A taktak ti ahcun, Paletwa peng hna ah ṭhanchonak rian ṭuan khawh a si ko. Tedim lawng ah Budget a zapi in a thlak caah cozah phu hna karlak ah i remlonak a chuak” tiah cozah rianṭuantu pakhat nih Mizzima ah a chim.
SAC nih Dr. Vung Suan Thang cu 2022 August 19 ah Chin ramkulh Chief Minister ah rian an khinh.
Dr. Vung Suan Thang hi 2020 thimnak ah USDP aiawh in Tedim peng ah aa zuam mi a si nain teinak a rak hmu lo.
Min Aung Hliang nih 2022 November 17 National Day ah minṭhatnak boih a pek mi hna lak ah aa tel ve.
SAC nih a luancia August 3 zong ah Minister hmunhma a lawng mi riankhinhnak le Union Minister pawl thlennawnak a tuah tiah theih a si.
About The Author
