Chin ramkulh chung mipi uknak phu pawl

The Chinland Post | 2022 May 9 – Chin ramkulh ah SAC nih hramhram in uknak a lak hnu March thla thok in mipi uknak phu pawl dirh thluahmah a si. Chin ramkulh ah kahdohnak a fah tuk lioah SAC le mipi phu hna cu uknak an i chuh lio a si ve.

Chin ramkulh chung peng tampi ah NUG lam hruainak in peng kip mipi uknak phu pawl dirh a si i ngandamnak lei, fimak lei, uknak lei hna tawlrel a si. A tulio caan Chin ramkulh ah mipi uknak phu pawl an tha a thawn deuh lio a si tiah ramkhel lei ngiathlaitu Ko Thawng nih hitihin a chim.

“Uknak phu tam deuh cu CDF nih nih mipi uknak phu an dirh kha hmuh khawh a si. Chin ramkulh khute a tam deuh cu mipi uknak phu hna nih an huap khawh hna tiah chim khawh a si. SAC nih Hakha khuapi, Falam khuapi tiah khuapi chung lawng an tlaih khawh. Khuate hna hi cu an kut chungah a um kho lo tiah chim khawh a si”.

CNF biachimnak nawl a ngeitu Salai Htet Ni nih Chin ramkulh chung mipi uknak hmual a ngeih khawhnak hnga phu then in dirh a si.

“A um ciami peng uknak, mah hmunhma te i uknak, biaceihnak phu pawl hmual ngei deuh in rian a kal khawhnak hnga kanmah hmunhma hriamtlai phu pawl chung in raltuknak lei uknak phu pawl he biatak thlak in kan tuan lio a si. Chin ramkulh an mah le hmunhma kip uknak phu pawl he tonnak pakhat ser in Chin ramkulh Chinland Council a phak khawhnak hnga kan i zuam chih lio a si.

Peng kip mipi uknak phu chungah CDM a tuahmi pawl, Hluttaw palai pawl, mipi lei phu pawl, Democracy a duhmi mino pawl, khuanu khuapa pawl le hriamtlai phu pawl an i tel. Mipi uknak a thawn biknak a simi Mindat khua ahcun, ngandamnak, biaceihnak rian le fimnak lei zong NUG cozah he pehtlai in riantuan a si tiah uknak le fimnak lei chungtel a simi Ko Hung nih a chim.

“Mindat fimnak lei kong he pehtlai in a hramthok ahcun caantawi te ca kan zoh hmasa. NUG lamhruainak in thla 6 kan on. Hngakchia pawl pehtlai tein fimnak an cawn khawhnak hnga caah tiin kan thok hmasa. A tu cu kumkhat leng dothlennak a fak chin thluahmah. Kum thum li ca ruat chih buin fimnak lei hi hmai kan nor a hau cang. Mindat khua ah Primary School tiang kan on chung rih.  Asinain, June thla thok in Middle School on ding kan i timhtuah lio a si. Hmaikum lei cun High School on khawh ding in timhtuahnak kan ngei. Saya/mah kan i phazo lo tuk”.

Biaceihnak lei kap ahcun, sualphawtnak pakhat khat a um a si ahcun, Chin miphun kan zulhphung le kan tlaihtleng ning in biachahnak kan tuah tiah uknak lei chungtel pakhat nih a chim. A hlan cozah uknak phung nak in a tu mipi uknak phu uk daan hi hmual a ngei deuh tiah khuami Ko Pi nih a chim.

” An uk daan a tha tuk, a tlamtling. Uknak lei bawi pawl he zong kan i neihniam. I chawnhbiak tikah a hlan bantuk in harnnak a um lo. Uknak lei bawi pawl an biachahnak zong hmual a ngei khun”.

Chin ramkulh peng tampi ah, SAC uknak le mipi uknak tiah uknak phun hnih a um caah mipi hna caah harnak a tam deuh khun tiah Mindat peng mipi uknak phu chungtel pakhat nih a chim.

“Uknak phu nih a um caah a lamkip in tha tein tlaih khawh a si lo. Mipi hna harnak an tong. Kap hnih ning tein mipi nih tih kan si, kap hnih lei nih tha tein kan uk kho veve fawn lo. Cucaah, a karlak umkalnak ah harnak tampi a um. Thilrii phorh le uknak lei ah mipi harnak an tong dih”.

Mipi uknak phu pawl hi khuate uknak le biaceihnak lei ah thazang an chuah deuh kho i fimnak le ngandamnak lei ah an tha a der ngai rih tiah Chin ramkhel lei ngiatlaitu Ko Thawng nih a chim.

“Fimnak le ngandamnak lei ahcun a hlan bantuk in an tuahpiak kho ti hna lo. A tu bantuk caan chiat lioah, hngakchia hna an hmailei, fimnak le ngandam lei kong he pehtlai in harnak tampi chungah a thabik in tawl rel a hau ko hnga. A hlan bantuk in cozah pakhat nih a tawlrelpiak mi bantuk in hmual a ngeimi dirhmun cu hmuh khawh a si rih lo”.

Chin ramkulh mipi uknak phu pawl chanbaunak a um bantuk in an herhbaumi pawl NUG cozah bawmhchannak a um tuk lo mi dirhmun ah mah tein i tawlrel chih a si tiah uknak lei chungtel pakhat nih a chim. Chin ramkulh chungah, a lo cio lomi “PHUN” hriamtlai hna karlak uknak dirh zong a har tuk.

Peng kip in then a simi mipi hriamtlai phu hna karlak zongah SAC hramhram uknak  hrawh cikcek ding in hmuitinh i khah a si ko nain, a dang aa khat lomi hmuitinh zong ngeih cio a si tiah ngiatlaitu hna nih an chim.

Ref: VOA Burmese News

Na ruahning rak langhter ve.. (Leave a comment)

%d bloggers like this: