Chin Ramkulh Cozah Nih Eihmuar An Dohnak Nehnang Kan Hmu Rih Lo; Pu Lal Maung Cung
Salai Elvis| 2018 March 4| Chin ramkulh cozah nih a tuni tiang ah eihmur an doh tiin kan ruah lo pinah an dohnak nehnang zong kan hmu rih lo i a tlau zong tlau hlei lo, amah ning peng a si ko tiah Pu Lal Maung Cung nih a chim.
“Tuandeuh cozah nak hmanh in tutan cozah ah hin, a dik lo mi hi tlawmpal a thang deuh hlah maw tiah kan ruah caan zong a um. Eihmuar kong cu zeiti theih awk cu a tha lo nain anmah Hluttaw speaker lila zong nih an chim tikah kanmah nih kan zumhmi cio kha tampi a hunglang. Anmah nih cun eihmnuar hi kan do lai an ti ko. Eihmuar ruangah cozah zung riantuan le Company pakhat hmanh dandatmi zong kan hmuh hna lo tikah hi konghi an doh ti zong ka zum lo. An chim ning bantuk in an doh lo tikah a um peng tiin kan ruah peng ko. Kanmah zong nih kan hmuh khawh tawk in kan ngiat leng mang ve hna” tiah Thantlang peng CND haotu Pu Lal Maung Cung nih The Chinland Post ah a chim.
“Keimah nih a hnu bik ka hmuh khawhmi ahcun Thantlang pengah sianginn sakding hmun 6 a tla. Mah hna kha Tender auh lo in Company pahnih lawng nih rian paruk ningin an tuan ko. Mizapi lei in hmuh ning ahcun a chungah thil pa khatkhat a um ti kha purhdah a si ko. Company cheukhat rianngei lo in an um lio ah tender au lo in hi thil an pekmi hna cu kan lunghrinh ngai ve hna. Hi kongah thil sining (tet-te) kan ngeih ve lo tikah kam khat lei cun a har ngai. Eihmuarnak hi hmuh khawh a si lo nain Company pakhat nih rian a hmuh tikah a dik lo mi tampi hmuh khawh a si” tiah Pu Lal Maung Cung nih a chim.
USDP cozah chan lio ah MP cheukhat nih tender kongah tualchung Company nih a tuan khawh ko ahcun papek in tuanter ding tiah biatak tein Hluttaw ah an rak ceihmai bal cang tiah theih a si.
Pu Lal Maung Cung hi tu lio Thantlang peng, CNDP (Chin National Democratic Party) party haotu lutlai a si. Amah hi a luancia cozah chan ahkhan Thantlang peng ramkulh hlutttaw in MP a tlingmi le kum 5 chung riantuanmi a rak si.
Photo: Lal Maung Cung facebook
About The Author
