Chin Ramkulh Zohchunhtlak Taih-ne Sii-inn Ah Rihkhawdar Taih-ne Sii-inn An Thim

City Hunter| 2018 April 18|ย Chin ramkulh, Rihkhawdar Taih-ne sii-inn cu 2017 kum caah Chin ramkulh chung i taih-ne sii-inn vialte lakah zohchunhtlak sii-inn ah Chin ramkulh Mizapi Ngandamnak le Thlopbulnak zung nih a thim i upat peknak Roca an tial tiah kan theih.

Taih-ne sii-inn sining dirhmun le tahfung he aa tlak in Rihkhawdar taih-ne sii-inn cu sii thlopbulnak, sii-inn umtuning, a thianhlim ning, operation an tuahning, sii-ai an fimken ning, mizaw an thlopbul ning, hmunthur an hlonhning, zunput, ti kholhnak tibantuk an hmanning a tlamtlin ca le a thianhlimnak cung ah Chin ramkulh taih-ne sii-inn vialte lak chung in 2017 kum caah atu bantuk in zohchunhtlak taih-ne sii-inn ah an thim hi a si.

โ€œChin ramkulh chung taih-ne sii-inn vialte lakah zohchunhtlak sii-inn i an thim ca le conglawmh upatnak roca pek kan simi cung ah kan i lawm tuk. Hi bantuk in zohchunhtlak laksawng kan hmuh khawhnak hi keimah pakhat i zuamnak lawng in a si khomi a si lo. Keimah he rian a tuantimi siibawi, nurse, zaanghleicawi le dawtnak in rian a tuantu hna vialte an i pekchanhnak, an i zuamnak, lungrualte in rian an tuantinak thawng in a si. Cu ruang ah ka riantuanti hawi chungkhar vialte cung ah kaa lawm. Zeiruang ah ti ahcun kannih cu team work in rian kan tuan, thianhlimhnak thawk in. A hramthawk ahcun mizaw cheukhat cu sii-inn ah rak i thlop lo in anmah ruahdomh in inn ah an i thlop. A hnu ahcun an lung a hung fim i mi tampi nih sii-inn an panh cang. Rihkhawdar taih-ne sii-inn nih mizapi sin ah chim kan duhmi cu kan dam lo kan i hngalh cangka mah ruahdomhnak he sii-ai i thlop lo in sii-inn ah ra uh ti k an duh. Rihkhawdar taih-ne sii-inn zong nih mizapi ngandamnak caah kan si khawh chung le dawtnak he kan in thlopbul ko hnaโ€ tiah Rihkhawdar taih-ne sii-inn tuanvo ngeitu Dr. Soe Thi Ha nih a chim.

Rihkhawdar taih-ne sii-inn ah ihkhun 16 a um i atu ah tuanvo ngeitu siibawi pakhat, sii-bawi bawmtu pakhat, nurse sayamah paruk, riantuantu dang pakua, an zapi 17 an si. 2017 kum chung a leng in mizaw aa thlopbulmi hi nikhat ah buaktlak in zatuak 15% tluk an si. Sii-inn ah a itmi (a chung) mizaw aa thlopbulmi hi nikhat ah buaktlak in 7% tluk an si tiah theih a si.

Ref: Iprd Rihkhawdar

Na ruahning rak langhter ve.. (Leave a comment)

%d bloggers like this: