CNF Headquarters bom a thlatu vanlawng mawng pawl an hlat khawh hna
The Chinland Post | 2023 January 16 – Chin National Front headquarters cu SAC nih ni 2 chung vanlawng in bom a thlak i cu vanlawng a mawngtu ralkap 8 an cazin cu People’s Spring nih a hlat khawh.
January 10 zaanlei ah SAC nih Chin ramkulh, Thantlang peng, Myanmar-India ramri ah a um mi CNF Headquarters, Camp Victoria, cu vanlawng 5 in bom a thlak i CNA ralkap 5 an nunnak a liam, 10 hrawng an rak i hliam. January 11 zaanlei zong ah vanlawng 3 in bom a thlak ṭhan i inn a rawk mi cheukhat an um, minung bel an rak i hliam lo.
Kahdohnak pawl cu No.62 kahdohnak vanlei phu (တံတားဦး လေတပ်) le Ayelar (အေလာ) vanlei ralkap nih Russia chuah YAK -130 in an kah mi hna a si tiah min a langhter a duh lo mi Naypyitaw Council sin in theih a si.
January 10 kahdohnak kha တံတားဦးလေတပ် in vanlawng 3, အေလာ invanlawng 2 nih an tuah i Major Ye Zaw Naing, Major Min Soe Kyaw, Major Yan Naing San hna le အေလာတပ် in Major Thet Lin Maung, Major Thein Zaw Myint hna nih an kah mi a si tiah ralkap lei thawng a theitu nih People’s Spring ah a chim.
A voihnihnak kahdohnak a si mi January 11 zaanlei ah vanlawng 3 in an kah ṭhan i တံတားဦး in vanlawng 1, အေလာ in vanlawng 2 an i tel. တံတားဦးလေတပ် in Major Nay Win Kyaw, အေလာ in Major Thet Lin Maung, Captain Zeya Myo hna nih YAK – 130 vanlawng in an kah hna tiah theih a si.
Cun mipi le artists telh in minung 100 leng an thihnak Kachin ram, Hpakan peng, A Nan hlasaknak lio ah bom a thla mi vanlawng mawng 3 cu CNF Headquarters kahdohnak ah an i tel ṭhan. January 10 kahdohnak ah Major Ye Zaw Naing le Major Min Soe Kyaw, January 11 kahdohnak ah Major Nay Win Kyaw hna 3 hi aa tel ṭhan mi cu an si.
About The Author
