CNF Nih AA Ralkap Hi Doh Kan Timh Hna Nain Cozah Ralkap Nih A Kan Thlauh; Dr. Sui Khar
City Hunter| 2018 March 5| Chin ramkulh Paletwa peng ah mizapi harnak a pe lengmangtu Arakan Army (AA) ralkap hi Chin National Fron/Army (CNF/CNA) nih doh le a herhning in tlangtlak an timh ko hna nain Myanmar ralkap phu nih an thlauh hna tiah kan theih.
Hi kong he pehtlai in CNF ah AGS rian a tuan liomi Dr. Sui Khar nih February 23-25 tiang tuahmi Chin Youth Organization Conference ah atu bantuk in a chim.
“Paletwa ah buainak a chuahpitu le Chin mizapi harnak a pe lengmangtu AA ralkap hi tuanpi in khan CNF/CNA nih tlangtlak kan timh lengmang ko hna. Anmah AA ralkap upa hna he zong ton biaruahnak kan ngei cang. Chinram chung ah CNA ralkap le cozah ralkap lawng khuasak, thutdirnak nawl kan ngei. Cu tikah AA ralkap cawlcanghnak kong ah Kawlram cozah lutlai upa cheukhat le ralkap lei lutlai pawl he ton biaruahnak kan ngei. CNF/CNA nih fakpi in hmalaknak kan tuah cang lai kan ti hna. Asinain anmah cozah lei ralkap lutlai pawl nihcun um rih uh nanmah cawlcangh a hau lo, kanmah nih kan nor ko hna lai ti a kan thlauh caah kan daih than.”
“Kannih CNF/CNA cu rampi daihnak ser a duhmi kan si ca le kan ram daihnak hi cabuai cung biaruahnak lawng in a si kho lai ti kan zumh. Cu ruang ah cu lam cu CNF/CNA nih kan i tlaih i kan zulh. AA ralkap hi CNF/CNA nih meithal i put in tukdoh kan tim hna lo. Cabuai cung hriamnam i put in kan doh hna lai. Cozah he hnatlaknak minthutmi ning in kan Chinram hi kan kilven lai i kan thanchoter lai. Kan Chinram chung i an buai peng rih ahcun ziah nan zoh sawhsawh ko hna tiah kan biahrenmi ning in cozah le ralkap kha an chak kan rengh vete ko hna lai” tiah Dr. Sui Khar nih a biapeh ah a chimchih.
About The Author
