Communist Rim Nam Min Aung Hlaing Uknak
Salai Mangpau | October 2, 2023 —
Communist hrinsor (Anti- Communism DNA) nih a hrin mi Myanmar ralkap tuanbia ah a tuahsernak a chiakha cem mi Ralhrang bawizik Min Aung Hlaing chan ah DNA thlen mi ralkap a si cang tiah biahalnak a hun um.
Myanmar ram Independence a hmuh hnu ah ramchung ah Burma Communist Party (BCP) cu an doh, Communist duhlonak a aupi cem mi Myanmar ralkap cu nihin ah vawlei cung ramkip nih hawikomh duh lo in an hrial bik mi Communist ram hna he hawikomhnak lam thar a tuah cuahmah cu mithmuh a si.
2021 February thla ah ralkap nih uknak a lak hnu in vawlei cung ramkip nih hawikom duh ti lo in an kal tak mi Min Aung Hlaing cu North Korea, Russia le Belarus Communist ram pawl he hawikomhnak ser in pehtlainak a tuah.
North Korea he Pehtlaihnak
2023, September 11 ah Tuluk ram hawikomhnak ah SAC nih palai U Tin Maung Shwe cu North Korea ram le Tuluk ram Palai ramhnih komh in rian a pek.
2016 kum United National Security Council (UNSC) nih a zizut kharphih a tong mi North Korea ram Korea Mining Development Trading Corporation (KOMID) he pehtlaihnak a ngei mi, Yangon um North Korea Palai Kim Sok Chol cu NLD hruai mi mipi cozah chan ah UNSC biaceihnak 2016, March 2 No. 2270 cahmai 13 chung um bantuk in Palai Kim Sok Chol cu Myanmar ram chung in an rak ṭhawl.
2017, April 26 ah Yangon North Korea palai Kim Chol Nam cu KOMID he pehtlainak a tuah ti in Myammar ram in an dawi ve ṭhan.
North Korea KOMID hi vawlei cung hriam pawl phungning lo in a zuar tiah UNSC nih phihkharnak a tuah mi a si. Vawlei cung ramkip pehtlaihnak palai rianṭuanning phunglam Vienna Conventions on Diplomatic and Consular Relations phunglam kalh in rian a ṭuan.
Hlan Myanmar ram ralkap uknak chan ah Directorate of Defense Industries – DDI nih North Korea ram ah hriamnan a rak cawk caah US ram nih phihkharnak a tuah. Atu Min Aung Hlaing uknak a lak hnu December 2021 kum in DDI cu phihkharnak a tuah ṭhan.
Min Aung Hlaing nih North Korea ram he pehtlainak kong le Palai rianpek mi cu North Korea ram phihkhar mi ah Myanmar nih nawl a zulh duhlonak kong ah UNSC chung ceihhmaiding in ruah awk a hun umter ṭhan.
Vawlei Pi Nih Hawikomh Duh Tilo Mi Russia President He Pehtlaihnak A Tuah
Russia nih Ukraine a tuknak kong ah hna a tlakpi i President Putin cu vawlei pi hruaitu patling dirhmun ah a chiatu Min Aung Hlaing cu vawlei pi nih zei an rel kho ti lo. A ruang cu Min Aung Hlaing hi vawleicung zei ram hmanh nih Myanmar ram hruaitu dirhmun ah an pom ve ti lo.
Min Aung Hlaing caah Russia hi a biapi tuk. Ramchung mipi duhpaoh in thahnawnnak le kutthlak in a duhpaoh a tuahtu pa Min Aung Hlaing cu UNSC nih a zi an zut lo khawh lo nakhnga Russia nih dirkamh aa tim peng.
Sihmahsehlaw vawlei cung ral pahnihnak hnu ramlian pi pakhat dirhmun a ngei mi Russia ram nih Ukraine ram a tuk hnu in vawlei cung ram ah mithmai a ngei ti lo mi President Putin cu ICC nih tlaih ding in nawl a chuah caah ramdang khual a tlawng ngam ti lo. Ka hnu thla South Africa ram BRICS meeting le India ram G 20 meeting zong ah Putin cu kal in aa tel ngam ti lo.
Communism le Burmanism
Communism phunglam a rak thawktu Karl Marx nih “Biaknak cu mi zapi i opium (bing)’’ a si. ‘Religion is the opiate of the masses or religion is the opium of the people’ a si tiah a rak ti. A chim rih mi cu, biaknak cu minung nih hi vawleicung an nunnak ah an sican ning a fiang huaha lo mi i hnemhternak ah ser mi, vawleicung thil tak sining chung in thinlung mersan thlen luatter-nak ca i ritsii a si, a ti.
Communism zumhnak phunglam a chuahpitu Karl Marx le hruaitu a si mi hna Vladimir Lenin, Joseph Stalin te pawl nih cun Pathian a um lo ‘Atheism’ – ဘုရားမဲ့ဝါဒ ti mi ruahnak (ideology) cu biatak tein an rak dirpi i, biaknak bu pawl cu faak ngai in an rak doh hna. Vladimir Lenin nih, dothlennak a tuahtu communist dik tak a si mi nih cun, Pathian a um lo (athism) ti mi cu hmaithlak in an dirpi lai i biaknak (religion) bu, Jews le Muslim biaknak tel in, an doh thluangthluan lai. Zei ca’h tiah biaknak cu mi thinlung ritternak siii (psychological opiate) a si i, minung nih mahte thin-lung i khiah khawh nak a chuh i, minu le mipa hna i an sining tak kha a uk, tiah a rak ti. A mak ngai mi pakhat cu, Russia communist uknak chan lio i 1936 kum rampi uknak phunglam ṭial mi ah mah zumh mi biaknak zalong tein zulhbiak khawh a si ti mi le zalong tein bia le hla in biaknak dohdal khawh nak nawl pek a si ti mi a rak um.
Cuti in duhnung ngai le ṭha ngai in ram uknak phunglam cu an rak ṭial ko nain, a tak ahcun Kharihfa le biaknak bu cu hna an rak hnawh hna i biakinn le biakinn thilri pawl rampi cozah ngeihmi thilri ca ah ti in an hrawh, an chuh hna. Pastors (Orthodox priests) pawl le zumtu khrihfa le biaknak dang zumtu tampi an tlaih an thah hna i mi tampi cu an zumhbiaknak thlah hna seh ti in hrenginn ah an khumh hna, rianhraang ṭuannak hmun ah an kuat hna i a cheu cu a mawlh-aa ti in lungzawtnak siizung ah an chiah hna, ti a rak si. Communist (Bolshevists) pawl nih cozah an vun ser i kum 5 chung ah Russian Orthodox bishops 28 le Russian Orthodox priests 1,200 an rak thah hna ti a si. 1928 kum in sianginn ah biaknak bu ṭhatlonak le dohnak kong zong tang khat in an cawnter hna ti si. Mah cu ti i biatak tein biaknak bu hruaitu pawl le zumtu khrihfa pawl an tlaih, an hrem, an thah hna hi WW2 raldonak a phanh tiang kha a si, ti si.
WW2 raldonak a hung chuak i, Nazi Germany ralkap nih Europe nichuah lei Russia ram cu 1941 June thla ah an hei tuk i Russia khualipi Mosco tiang an hei laak khawh dih dengmang. Nazi ralkap nih an teilaak mi Russia ram chung biakinn khar mi pawl cu an hun piak ṭhan hna, zalong tein biakinn pumhnak nawl an pek ṭhan hna i, Russia ram i ‘Pathian A Um Lo’ ti mi bu zong an hrawh piak hna ti si.
Mah cu lio ah cun, khat lei in, cu hlan ah Khrihfa bu le biaknak a rak doh ngai mi, a rak hrem zungzal tu hna Russia ram hruaitu Joseph Stalin nih thinphan ah Russian Orthodox Church pawl cu Nazi German ṭanh hna lo ding in le amah sin lei ṭan ding in a rak lem hna i, biakinn an khar piak mi hna zong pumhnak nawl a rak pek ve ṭhan hna. Communist phunglam a rak chuahpi tu Karl Marx nih ‘Biaknak cu mizapi i opium (bing)’ a si, riitsi a si, mi thinlung a thlentertu, a latu a si tiah a rak ti mi kha i laak in, Orthodox Church biaknak bu cu German ral dohnak i bawmtu tha-zaang pakhat ah a rak hman hna ti si.
Tu tan Kawlram buainak zong ah hin, Min Aung Hlaing le a mi hna nih Kawl Buddhist biaknak cu anmah bawmtu thazaang ah hman an timh ve mi hna hi, Russia ram biaknak sining he cun a rak i dang lai nain, biaknak bu (မဘသ) pawl hman an timh ning hna he cun aa khat nawn ko ti khawh a si. Cu belte anmah Buddhist biaknak bia Kawlmi lila zong nih an zum ti hna lo i, annih cu an hlawh a tling dih kho lo kan ti lai. British Colony cozah nih Kawlram a rak uk lio ah hin British cozah uknak duh lo le doh ding in tiah Kawlmi nih 1906 kum ah Young Men’s Buddhist Association (YMBA) ဗုဒ္ဓဘာသာကလျာဏယုဝအသင်း ti mi le 1930 kum ah တို့ဗမာအစည်းအရုံ (We Burman Association) ti mi bu an rak dirh. Cu bu i a lut mi nih cun kanmah hi Thakhin (Master) kan si, Mirang an si lo tiah an min hmai ah Thakhin ‘သခင်’ an rak i bunh cio dih hna. YMBA nih cun ‘Burma cu kan ram, Kawl holh cu kan holh, Buddhists biaknak cu kan biaknak’ a si, kan cawisan ding a si ti mi tlaihtleng bia an hun chuahpi. Kawl holh in cun ‘အမျိုး ဘာသာ သာသနာ’ kan cawisan lai ti khi a rak si.
Belarus Ram Ser Hriamnan A Caw Mi Min Aung Hlaing
Belarus ram uktu President Aleksandr Lukashenko cu Russia president Putin he ram pawngkam naihniam a si i, Ukraine tuknak kong ah Russia ralkap pawl Belarus ram umkalnak nawl a pek caah Russia bantuk in vawlei cung ram hna nih hawikom an tuah duh ve ti lo.
SAC ralhrang nih Belarus ram he hawikomhnak a tuahnak chan hi thil 2 a um. Pakhatnak ah Belarus nih Russia ram ser hriamnam a cawk kho, pahnihnak ah vawlei cung UNO chungtel ram lak ah SAC ralhrang duhning in ramchung mi uktu ah Belarus hi aa tel.
Myanmar SAC thazang langhternak ah Kvadrat- M SAM vanral khamnak system le vanral tuknak Helicopter 2 cu Belarus sin in a cawk mi a si.
Belarush ram ser hriamnan Kvadrat-M SAM Air Defense System
Kvadrat-M SAM vanral khamnak rocket 100 cu 2014-2016 kum ah a cawk. Mi 24 P le Mi 35 P Helicopter 2 cu 2018-2019 kum ah Belarus ram in a cawk tiah Sweden ram Stcokholm International Peace Research Institute (SIPRI) sin in theih a si.
Min Aung Hlaing Nih A Hmanmi Thlak-Chuah-Thah
Min Aung Hlaing nih North Korea, Russia le Belarus bantuk in Communist hruaining phunglam bantuk in ramchung ah SAC chungtel cheukhat an thlak- chuah- thah phunglam a hman,mi hi nihin SAC chung ah ceihhmainak a tam ngai cang. Amah he naihniam a zumh ngai mi L.t Moe Myint Tun a tlaihnak kong he pehtlai in a kuttang mi nih an zumh ti lo. Myanmar kyat tangka man ngei lo a umnak kong hna dothlat ding in SAC bawizik nih bia cahnak a ngeih hnu in a leng lei Sui zuar, dollar zuar le a dang chawlet tu hna lutlai General Yan Naing Soe cu an tlaih. General Yan Naing Soe hi L.t General Moe Myint Tun a kut khatlei bantuk in a bochan ngai mi minung a si. Sipuazi rianṭuan mirum hna a si mi Myawaddy bank, Myanmar Economic Corporation le SAC nih a tuah mi Sipuazi riantuannak lei lutlai tampi nih L.t Moe Myint Tun cu tangka zikhnawh an pek ṭheu caah L.t Moe Myint Tun cu tlaih a tong.
Cucaah SAC chungtel lutlai karlak ah eihmurnak in an luat cio maw? Min Aung Hlaing le a innchungkhar ah eihmurnak an tuah ve hnga lo maw ti biahal awk a um ve. SAC chungtel ralbawi hna an rum ning zohtik ah eihmurnak an tuah cio ko hna ti hi mithmuh a phi a si ko.
Cherhchan: 1. Tuh Tah Zaw, September 23, Myanmar Now/ 2. David C.B Ling
About The Author
