Gangaw LIB 50 Nih Hriamngan A Kah Ruang Ah Mipi 3 An Thi, 4 An I Hliam
The Chinland Post | 2024 May 27 — Magway ramṭhen, Gangaw hrambunh LIB 50 nih hriamngan an kah caah mipi 3 an thi i hngakchia 2 telh in 4 an i hliam tiah Gangaw peng mipi uknak phu nih an thanh.
May 26 zinglei sml 10:00am hrawng ah LIB 50 in an kah mi hriamngan 2 cu Aungmin khuate um mipi inn cung ah a tla i a puah caah mipi an thih le hliam an tuar hi a si tiah an langhter.
Hliam a tuar mi chung ah thla 8 hngakchia 1, kum 4 hngakchia 1 le kum 68 upa pakhat an i tel tiah Yaw Alindan zong nih an langhter.
Hliam a tuar mi hna hi an nunnak cu thinphan awk a um lo tiah theih a si.
Gangaw peng, May 16 zong ah Myaukkhinyan khua in SAC ralkap le pyusawhti pawl nih Yethar le Shwebo khua hna ah lut in mipi 2 an thah hna leng ah mipi inn 300 hrawng zong an khangh tiah Gangaw peng mipi uknak phu nih cun an thanh.
Gangaw pengkomh chung a um mi Saw peng, Agyipanpalwin khua le Ṭawma khua hna cu May 19 le May 14 ah SAC nih van lei in kahdohnak a tuah i mipi 25 nak tlawm lo an thi, 40 hrawng an i hliam tiah theih a si.
About The Author
