Hakha Dawrthar Sang Ah Pu Khua Lian Thang A Ruak In An Char
City Hunter| 2018 February 11| Pu Khua Lian Thang @Soe Paing cu Hakha Dawrthar sang, Auto sangthen, February 11 zingka ah a ruak in an char tiah kan theih.
Hi kong he pehtlai in atu lio Dawrthar khuabawi a tuan liomi Pu Hrang Kep nih atu bantuk in The Chinland Post ah a chim.
“Pu Khua Lian Thang @Soe Paing ruak hi Hakha Dawrthar sang, Auto sangthen, second lam Pu Za Tawn te inn pawng ah tu zingka te ah khan asawng (boarder) siangngakchia nih a ruak in an hmuh i atu hi sii-inn ah kalpi ding in kan laak cuahmah liopi a si. Concrete in tuahmi luti hor ah a tla i a lubek a kuai. A tlak le aa hliam hi zahan zan ah si dawh a si. Siangngakchia nih an hmuh hi deika te ah a si. Zeitindah concrete tuahmi luti hor ah a tlak ti le zahan zan zei tluk hrawng ah dah a tlak ti cu fiang in hngalh a si lo. Asinain amahte in tlak dawh a si. A nunnak thaw tu cu zeihmanh a um ti lo, a thi ko cang.”
“Amah hi Auto sang ah a ummi a si. A nupi he an i then i a fapa te lawng he khua a sami a si. Amah hi Surkhuami a si. Atu hi a ruak phorhnak motor kan hlan lio a si i a rat in kan phorh lai i sii-inn ah kan va kalpi hmasa lai. Cu hnu ah a ruak cu suan le fim a si te lai” tiah a biapeh ah a chimchap.
Pu Khua Lian Thang @Soe Paing ruak cu khuabawi, sangmi le chungkhar nih an bultul cuahmah liopi a si. Cozah upadi ningte in sii-inn ah aa khawnning pawl chek hmasa a hauh ruang ah sii-inn ah kalpi hmasa an timhnak hi a si tiah kan theih.
Photo: Pu Hrang Kep facebook
About The Author
