Hakha-CDF Nih Hakha Khuachung Hmun 3 Ah Kahdohnak An Tuah
The Chinland Post | 2024 June 3 – Chin ramkulh, Hakha khua ah CDF-Hakha nih Cikha le Tonzang khua kahdohnak (Operation Exodus) ah nunnak a pe mi CDF-Hakha hriamtlai Salai Peng Tu Thang le Salai Van Duh Peng hna upatpeknak, Operation Exodus conglawmhnak le bawmhnak ca ah ti in Hakha khuachung hmun 3 ah kahdohnak an tuah tiah CDF-Hakha nih thawng a thanh.
2024 May 18, May 20 le May 30 hna ah Rung Operation min in CDF-Hakha nih Hakha khuachung ah kahdohnak an tuah i SAC ralkap 2 a hmun ah an thah hna tiah theih a si.
Cun 2024 June 1 ah Operation Exodus (Cikha le Tonzang khua kahdohnak) in a rak kir mi CNA le dothlennak phu pawl conglawmhnak ca ah ti in Rung Operation an tuah than i luatnak lungphun (လွပ်လပ်ရေးကျောက်တိုင်) ah a um mi SAC ralkap pawl cu Drone in bom voi 2 an thlak hnawh hna. Cun Hakha thar sang, lam 6 tonnak le Cawbuk gate hna zong ah kahdohnak an tuah tiah theih a si.
June 1 kahdohnak he pehtlai in a thi/hliamtuar mi theih a si lo tiah an thanh.
Muicawl – CDF Hakha
About The Author
