Hakha Khuacuanhnak Tlang Innsang Saknak Caah CB Bank Nih Sing 200 An Hlut

Salai Ngun San Aung| 2018 January 17| Hakha-Kankaw lam ah a ummi Khuacuanhnak tlang i khuacuanhnak inn sang (Tower) saknak ding caah CB Bank nih kawlram tangka sing 200 an hlut.
CB Bank tel in singhra cung a hluttu minung 10 sinah tower saknak committee nih lunglawmhnak Roca an pek hna. CB Bank hlutmi tangka cohlannak le lunglawmh Roca peknak cu January 17, Chin ramkulh Cozah zung, Hakha ah an tuah.

“Hi tower saknak ding ahhin sing 700 tluk a dih lai tiah tuak chung a si. Tu tiang kan hmuhmi hi nuai 50.75 (sing zanga le sing sarih le thong sawmnga) a si cang. Hi tower saknak ding ahhin Vice President Pu Van Thio nih a hramthawknak sing 50 a kan hlut. Tutiang a hlumi hi pumpak le a bu in 46 an si cang. Pumpak a hlumi an tam deuh i ramchung minung deuh an si. Rian hi tukum February zarhkhat nak ah lim kho usi ti kan duh. Tangka hi sing 200 tluk kan herh rih. Tangka zong cu bawmh kan hal rih ko lai. Asinain tangka kan hmuh lo sual zongah rian cu aa lim nak in kan tuan ko lai” tiah tower saknak tuanvo ngeitu Sipin Director Pu Thla Hre nih TCP ah a chim.

January 17 zing sml. 8, ramkulh zung i hlutmi tangka cohlannak le lunglawmhnak roca peknak an tuah lio ah Hakha CB Bank chairman Pu Chum Ling le Sipin Director Pu Thla Hre nih biatawi chimnak an ngeih.

“CB Bank nih hin 2015 kokek har ton lio zong ah har tong pawl sin ah zeimawzat eidin bawmhnak kan rak pek hna. Nihin zong ah Hakha a dawhtertu ding le a thanchonak ca ah tuah mi tower tung caah hibantuk in bawmhnak pek khawhnak caan tha kan hmuh ve caah kan i lawm. CB Bank hi pumpak chawkawlnak ca lawng siloin zatlang le khuaram thanchonak ca zongah a si khawh tawk rian tuan aa tim peng mi kan si. Hmailei zongah kan si khawh tawk kan cawlcang ko lai” tiah Pu Chum Ling nih cun a chim.

Pu Thla Hre nih bawmhnak an hmuh cang mi cazin thanhnak, rian an tuan ning fianternak le lunglawmhnak a chim. Hi innsang (tower) cu pe 36 sang in an sak lai tiah kan theih.

Leave a Commnet

%d bloggers like this: