Headquarter chuahtak chung a si, CDF Mindat telh in hawikom phu cungah kan i lawm: CDF Kanpetlet
The Chinland Post | 2022 March 19 – CDF-Kanpetlet Headquarter cu chikhat chuahtak chung a si ko nain The Youth Force le PDF Saw hna cungah lunglawmhnak kan ngei tiah CDF-Kanpetlet Brigadier General nih a chim.
“CDF-Kanpetlet Headquarter cu chuahtak a si ko. Hi kahdohnak ah minung pakhat cio nih kan rian kan tlamtlinh dih, CDF-Mindat zong kan in bochan tuk hna bantuk in The Youth Force le PDF Saw zong hawikom kan sinak leng pi in nan rian nan tlamtlinh, mipi hna zong thatho tuk in nan rian nan tlamtlinh” tiah CDF-Kanpetlet Brigadier General nih a facebook ah a tar.
“Kan i ruahchan lomi harnak cu Mindat khua Kyaukhtoo Artillery nih chunitlak deng hriamngan in kah a bawmhmi hna hi a si. Ruah lo piin khua chungah hriamngan tamtuk a tlak caah inn hna a kaang, upa le hngakchia a hren hna. Khuami hna zei kan tuah lai ti an theih lo caah firearms a hmang thiammi khuapa hna nih firearms tlaih in meithal aw thannak lei an rak phan dih, mei zong a kaang. Hriamngan thawng cu a dai ti lo. Hriam hme thawng zong aa peh tuk i kahdohnak a fah tuk caah kan dirhmun a ṭha ti lo timi kha kan theih lioah CDF-Mindat Byu-Ha-Hmu (Northern Strategist) nih i.con in “firearms aa tlaihmi pawl hmai rak fong ti hlah uh” tiah a rak kan chimh. Firearms aa tlaihmi upa deuh pawl caah thinphang ngai in a chim caah ka ruahmi cu Chin miphun hriamtlai phu pawl zeitik caan, zeitik hmun poah ram dawtnak thinlung kan ngei a si ahcun SAC kuttang in kan luat colh lai, ka upat tuk” tiah CDF-Kanpetlet Brigadier General nih a peh chap.
“Headquarter kan chuahtaknak cungah thawngzamh cheukhat i comments ah phun tamtuk in an kan ti. Asinain, Mindat, Kanpetlet, Kyaukhtoo hna hriamngan karlak ah zing sml 8:00am in zaanlei sml 3:00pm tiang hriam hme in din lo tein kan doh hna caah kan thi a ngan ko tiah kan langhter ngam. Kahdohnak ngan taktak kan i ton a si. Donthlennak ah a cunglei hmunhma lawng tuak in a tanglei mipi hna nih bochan awk a tlak lomi phu nak cun kan tuahmi cungah ka lungsi”.
CDF-Kanpetlet Brigadier General nih a facebook cahmai ah a tarmi a si.
Ref: The Mindat Post
About The Author
