Hramhram in uknak lak caan kum 2 chung ah kahdohnak voi 8,100 leng a chuak
The Chinland Post | 2023 February 3 — Myanmar ram ah SAC nih hramhram in uknak a lak hnu thok in 2023 January 20 tiang Myanmar ram pumpi ah kahdohnak voi 8,100 leng a chuak tiah ISP-Myanmar nih February 2 ah a thanh.
Ralkap nih hramhram in uknak a lak hlan kum 10 chung ah kahdohnak voi 4,600 leng a rak chuak i hramhram in uknak lak a si hnu ah a let 2 in a karh.
Hramhram in uknak lak a si hnu ah ramkhel dirhmun a chiat tuk hi a fiang khun i raltuknak hmunhma a karh chin ti kha a lang.
2010-2020 tiang cozah a pahnih ning tein an i zuam mi ramkhel buainak cu cabuai cung ah tawlrel siseh ti mi zong hramhram in uknak lak a si hnu ah a rawk dih. SAC nih hramhram in thil a tuah ruang ah hriamtlaih lam hi thim lo awk a ṭha lo mi dirhmun a rak phan tiah an langhter.
Cu nih a chuahpi mi cu ramchung hriamtlai phu 600 leng an chuak i SAC nih Myanmar ramchung peng 198 lawng a uk khawh cang.
SAC nih hramhram in uknak a lak hnu ah ramchung ralzaam 2 million an phan i mipi inn 60,000 deng an hrawh tiah ISP-Myanmar nih a langhter.
About The Author
