Hramhram In Uknak Lak Hnu Kum 2 Chung Ah Biaknak Lei Inn 200 Deng An Hrawh : ICJ
The Chinland Post | 2023 July 5 — SAC nih hramhram in uknak a lak hnu kum 2 caan chung ah phungki sianginn pawl telh in Khrihfa le Muslim biaknak lei inn 200 deng doh le hrawh a si tiah International Commision of Jurist (ICJ) nih an thanh.
Minority (minung tlawm) miphun hna doh le nemnehnak hi hramhram in uknak lak a si hnu ah a zual chin tiah ICJ nih June thla report ah an langhter.
Hramhram in uknak lak a si hnu 2021 thawk in hramhram uknak a dohtu pawl tlaih, thah, le a phunphun in hremnak hna a a karh chin bantuk in minung tlawm deuh (Minority) biaknak le miphun hna namnehnak le dohnak hi a karh chin tiah ICJ nih a langhter.
2021 February in 2023 April tiang kum 2 chung ah Chin, Kachin, Karen, Karenni, Mon, Rakhine, Shan ram hna le Bago, Magway, Mandalay, Sagaing, Taninthary, Yangon ramṭhen hna ah vanlei kahdohnak le hriamngan kahdohnak ruang ah a rawk mi biaknak lei inn 190 leng a um i cu chung ah 158 hi cu SAC ralkap pawl kut in a rawk mi an si tiah ICJ nih a chim.
A luancia January thla ah Sagaing ramṭhen, Shwebo pengkomh, Ye U peng, Chantha khuate ah kum 500 deng a si cang mi Catholic biakinn pakhat hrawhpiak an tong.
Biaknak lei inn pawl khanghpiak a si leng ah SAC ralkap nih hmunhma khuarnak le sakhaan caah an hman hna i biaknak lei hruaitu pawl tlaih, thahnawnnak hna a karh chin bantuk in ralkap uknak tang ah minung tlawm u (Minority) biaknak pawl namneh chin a si hi thinphan awk ngaingai a si tiah an langhter.
Hramhram in uknak lak a si hnu ah hremnak ruang, hriamngan ruang, vanlei kahdohnak ruang le SAC ralkap nih kah ruang ah a nunnak a liam mi biaknak lei hruaitu 41 an um cang tiah report ah an langhter.
Myanmar ram ah SAC nih hramhram in uknak a lak hnu thawk in kum 2 chung ah biaknak phunkip namneh an tong tiah US Commission on International Religious Freedom (USCIRF) zong nih 2023 kum hramthawk lei ah report a langhter ve. US cozah nih May thla chung ah a chuah mi vawlei cung ramkip biaknak lei zalonnak report zong ah Myanmar ram hi vawlei cung ram lak ah biaknak zalonnak a rawh bik nak ram a si tiah cazin an khumh.
About The Author
