July Thla Chung Nyaunglaybin Pengkomh Ah Kahdohnak Voi 100 Hrawng A Chuak, SAC Ralbawi Telh In 160 Leng An Thi
The Chinland Post | 2023 August 11 — SAC ralkap le KNLA Brigade 3 karlak July thla chung ah a cang mi kahdohnak pawl ah Company Commander, Captain, Lieutenant telh in SAC ralkap 160 leng an thi i sualnak ngei lo mipi 5 SAC ralkap nih an thah hna tiah KNU Headquarters nih thawng an thanh.
Nyaunglaybin pengkomh, Brigade 3 ah July thlakhat chung ah KNLA Brigade 3 kuttang ralkap pawl le SAC ralkap karlak ah kahdohnak hme voi 96 a chuak i kahdohnak pawl chung ah SAC lei Company Commander 1, Captain 1, Lieutenant 1 telh in 166 an thi i Second Battalion Commander telh in 143 an i hliam tiah an langhter.
KNLA Brigade 3 kuttang ralkap 2 an nunnak a liam i 2 an i hliam ve. Kahdohnak ruang ah mipi 7 hliam an tuar i SAC ralkap pawl riahcaw an i chanhnak hlei voi 2 an hrawh khawh tiah KNU nih theihternak a tuah.
SAC nih KNLA Brigade 3 kuttang phu pawl vanlei in kahdohnak voi 12, Drone in voikhat le mipi umkalnak lam 3 cu seh-gyi in a hrawh tiah cathanh chung ah an langhter.
Kahdohnak pawl chung in SAC ralkap hriam zuun 11, kuanbawm, zen, bom tampi le raltuknak thilri pawl an lak khawh tiah theih a si.
Kahdohnak a chuah ruang ah SAC ralkap nih mipi ngir riangmang in khuate lei ah hriamngan lung 300 deng an kah caah mipi inn 17 a rawk i siahngakchia 2 telh in mipi 10 hliam an tuar bantuk in meithal nih mipi 2 a hliam hna tiah theih a si.
About The Author
