Kalay khuachung hmunhma 2 ah kahdohnak a chuak i SAC ralkap 4 an thi
The Chinland Post | 2022 June 16 – Sagaing ramṭhen, Kalaymyo, Tahan sang ah hmunhma a khuarmi SAC ralkap le meiman hal ah a vakmi SAC ralkap pawl cu kah an si i SAC ralkap 4 an thi, 7 nih hliamhma an tuar tiah CNDF nih June 15 ah a thanh.
June 13 ah Kalay khuachung, Tahan sang, pumpululh certual ah hmunhma khuarding in a rak phanmi SAC ralkap thazang 120 hrawng cu CNDF le Kalay hmunhma hriamtlai phu pawl nih zinglei sml 9:00am in an kah hna i sml pakhat hrawng kahdohnak a rau i SAC ralkap 2 an thi, 3 nih hliamhma an tuar tiah a thanh.
Sang chungah meiman hal ah a vakmi SAC ralkap pawl cu an kah ṭhan hna i 2 an thi, 4 nih hliamhma an tuar. Mipi hriamtlai phufonh lei hliamhma a tuarmi an um lo tiah theih a si.
May 31 le June 1 zongah Kalay peng, Natchaung khua ah SAC ralkap le mipi hriamtlai phu hna a simi CNDF, PDF-Kalay le PDF hna karlak ah kahdohnak a chuak i SAC ralkap 2 an thi. PDF-Kalay hriamtlai 1 a nunnak a liam i, 1 aa hliam. CNDF hriamtlai 1 zong hliamhma a tuar tiah theih a si.
About The Author
