Kalay peng ni 4 chung kahdohnak ah SAC ralkap 4 an thi, tampi nih hliamhma an tuar

The Chinland Post | 2022 June – 2 Sagiang ramṭhen, Kalay peng ah May 28-31 tiang a cangmi ni 4 chung kahdohnak ah SAC ralkap a tlawmbik 4 an thi i tampi nih hliamhma an tuar tiah PDF-Kalay nih June 1 ah a thanh.

Thlanglei Kalay ah thazang 50 leng in kahdohnak a tuahmi SAC ralkap le mipi hriamtlai phufonh hna cu  Helauk khua pawngah May 28 in kahdohnak an thok i SAC ralkap 3 an thi i Natmyaung, Natchaung khua kahdohnak chung zongah SAC ralkap 1 a thi chap.

Cun, SAC ralkap pawl cu Htaukkyan khua hnulei ah PDF-Kalay nih an kaltak cangmi battalion 2 sakhaan cu thazang 200 leng he an luh hnawh hna i PDF-Kalay nih timhcia tein an hmanhmi bom a puah caah tampi nih hliamhma an tuar.

SAC ralkap pawl cu an i ṭhen hnu ah Zawlpi khua le Tunginsuh khua ah an lut i inn pawl an khangh hna leng ah a thluak a ṭha pah ti lomi mipi 1 an thah tiah theih a si.

May 31 ah SAC ralkap pawl nih an kahmi hriamngan cu Natmyaung khua phungki sianginn chungah a tla i inn pawl a kangh lengah phungki sianginn chung a ummi kum 5 hngakchia 1 telh in ralzaam 4 hriamnhgan nih a khen hna i fak piin hma an pu tiah PDF-Kalay cathanhnak in theih a si.

Na ruahning rak langhter ve.. (Leave a comment)

%d bloggers like this: