Kalay Peng Ralkap Sakhaan Lak Kahdohnak Ah Ralkap 15 An Thi, Corporal 1 Telh In 2 An Tlaih Hna
The Chinland Post | 2023 November 24 — Sagaing ramṭhen, Kalaymyo thlanglei ah a um mi ralkap sakhaan pakhat cu dothlennak phu pawl nih November 23 zinglei sml 11:00am hrawng ah an lak khawh i Corporal 1 le adang ralkap 1 zong an tlaih hna tiah theih a si.
Kalaymyo thlanglei, Tan-pho khua pawng ah a um mi Yangyiaung ralkap sakhaan cu dothlennak phu pawl nih November 23 zinglei sml 3:00am hrawng thawk in sakhaan he 30 Yard hrawng aa hlatnak in hriamngan he an kah hna.
Cun ralkap lei nih an kah ve hna caah zinglei sml 5:00am luan hrawng le 7:00am luan hrawng ah Helicopter in voikhat veve a kah hna.
“Sakhaan hi sml 10:00an hrawng ah kan lak khawh cang nain 11:00am hrawng lawng ah kan lut kho. Ralkap pawl a zaam mi zong an um. Hriam phun tampi kan lak khawh. Zeizah dah a si cu ṭha tein kan check lio” tiah Kalay PDF chungtel 1 nih Burma Media Consortium ah a chim.
An tlaih mi ralkap 2 hna cu rianngeitu pawl nih an kalpi hna tiah theih a si.
Cun, kaphnih karlak kahdohnak ruang ah a thi mi ralkap 15 ruak zong dothlennak phu pawl nih an vui i ruak 4 hi a buar cang caah November 21 hrawng ah a thi mi an si lai tiah an zumh.
A luancia November 21 thawk in Yangyiaung sakhaan hi kahdoh rak thawk a si i cu ni kahdohnak ah dothlennak phu lei 1 a nunnak a liam, 2 an i hliam tiah Kalay PDF chungtel 1 nih a chim fawn.
Cu November 21 ni ah an i din i November 23 ah an kah ṭhan hnu ah sakhaan an lak beh hi a si.
Kahdohnak chung ah ralkap lei nih vanlawng in hriam pawl cu kuang 13 in a rak thlak i kuang 11 hi dothlennak phu lei nih an lak khawh.
November zarhthumnak chung ah Kalay peng ah ralkap le dothlennak phu karlak ah kahdohnak a fak i kaphnih lei a thi mi an um bantuk in Kalay peng thlanglei khuate in khuami 6,000 leng cu innlo zaamtak in an um tiah theih a si.
About The Author
