Kalewa kahdohnak ah SAC S.B.C telh in a thi mi an tam
The Chinland Post | 2023 February 6 — Sagaing ramṭhen, Kalewa peng ah mipi hriamtlai phu pawl le SAC ralkap karlak ah kahdohnak a chuak i SAC ralkap lei in Second Battalion Commander telh in a thi mi an tam tiah theih a si.
Kalewa peng chung ah January 19 thok in February 2 zinglei tiang zarhhnih leng kahdohnak a chuak. Kahdohnak chung ah SAC ralkap pawl a thi mi le hliam a tuar mi an tam caah an kir ṭhan tiah theih a si.
“Nifatin in kahdohnak a chuak. February 1 zaanlei thok in mipi hriamtlai phu pawl nih SAC ralkap kha karceh in an kah hna. Second Battalion Commander le adang 3 an thi. Hliam a tuar mi pawl zong laang in an put hna tiah” zumhtlak mi pakhat nih People’s Spring ah a chim.
Mipi hriamtlai phu he kahdohnak a tuah mi hi SAC Infantry 89 in an si i an rak luh lio ah 70 hrawng an si nain an kir lei cun 50 hrawng lawng an taang tiah hriamtlai phu lei nih an chim.
