Karenni Interim Executive Council (IEC) Nih Mipi Uknak Le Department Cio An Rianṭuanning An Chim
Salai Mangpau | August 31, 2023 — Karenni (Kayah) ramkulh chung ah SAC lei nih khuapi Loikaw khuachung lawng an uk khawh i, a dang peng, khuate tam deuh hmun cu Karenni Interim Executive Council (IEC) hruai mi uknak tang ah an um cang tiah Karenni Interim Executive Council (IEC) Vice-Chairman Khun Bi Htu nih DVB ah a chim.
“Uknak lei ah peng uknak-Township Administration in police, ngandamnak, fimcawnnak lei in sianginn 400 leng ah hngakchia cacawng mi 40,000 an si. Ngandamnak lei ah 90 chung in siikhan, siizung 8 an um. Khuate kip ah khuabawi thimnak le uknak serpiak an si. IEC lei uknak tang ah fimcawnnak, ngandamnak, harnak a tong mi sin bawmhchannak, Nu le hngakchia zohkhenhnak, nuhrin covo, tangka Budget kong, uknak, raldohnak le a dangdang kong biaceihnak zung ti in, IEC hruainak tang ah Department 12 ser a si i, atu department 5 cu rianṭuan a si cang tiah a chim .
Karenni uknak cu zapi funtom in hruaining bantuk in kan tuah cuahmah lio tiah (IEC) Vice-Chairman Khun Bi Htu nih cun, “Chief minister dirhmun ah kan mah IEC minung 7 hruainak in biakhiahnak, ralkap bu kong, biaceihnak te pawl kong ah khat le khat biaruahṭinak he khuakhan lairel a si. Department kip ah minung pakhat nih Minister thim le hruaining cang si lo in a tlawncem minung 4 cio tel in thim ding, hriamtlai lei, hluttaw lei, CDM an si lo ah a thiamsang mi phu, tiin mi zapi tel kho ding in department kip hruainak lam kan ser cuahmah lio a si” tiah a chim chap.
Karenni State Interim Executive Council-IEC cu 2023 kum June 6 ah committee minung 6 telh in dirh a si.
IEC nih timhmi phun 5 ahcun Karenni caan karlak programme ngeih mi pehzulh in rianṭuan ding, mipi nun humhimnak le a herhbau mi ṭuanbawmhding, upadi phung le lam tein uk le hmailei ramthlennak lam ah programme tuah in rianṭuanding, nuhrin covo, Federal Democracy zauk phung sernak ah federal state pakhat sernak ah committee chungtel sinak le mah tein khua khan lairelnak ngeihkhawh ding te pawl timhnak phun 5 he dirh a si.
Karenni ramkulh ah NUG Ramkomh Cozah le Ramkulh Federal Unit Commission he caan karlak ṭangrual in rianṭuanṭi ding in Karenni Interim Executive Council (IEC), Karenni State Consultative Council-KSCC hna a voikhatnak Meeting cu July 28 ni ah anrak tuah cang.
Meeting ah ramkomh cozah le ramkulh Federal Unit Commission Chairman caan karlak President Duwa Lashi La le Karenni State Consultative Council Aung San Oo nih awnnak bia an rak chim.
Cun, ramkomh cozah le ramkulh Federal Unit karlak ṭangrual in riantuanṭi ding Commission nih aa timh mi le hmailei a riantuan lai mi kong cu Ministry of Federal Affair’s Dr. Lian Hmung Sa Khong, Karenni State Consultative Council phunglam le hmailei rianṭuan ding mi cu Council Chairman Aung San Oo le Karenni Interim Executive Council (IEC) Vice-Chairman Khun Bi Htu hna nih bia an rak chim.
About The Author
