Karenni Ralzaam Camp Sianginn Ah SAC Vanlawng Bom Thlaknak In Hngakchia 4 An Thi, 10 Hliam An Tuar
The Chinland Post | February 6, 2024 – Karenni ramkulh, Demoso peng Mya Pa Le khuakonh, Daw Si Ei khua ralzaam camp ah hngakchia cacawnnak sianginn cu February 5 zing 10:00 am ah SAC vanlawng nih bom pound 500 rit mi a thlak hnawh hna caah sianghngakchia 4 an thi, 10 nih hliam an tuar tiah Karenni Nationalities Defernse Force-KNDF nih a chim.
“February 5 zing ah SAC vanlawng nih ralzaam sianghngakchia cacawn lio caan ah bom pound 500 rit mi a rak thlak, sianghngkachia 4 an thi colh, 10 hliam an tuar” tiah KNDF tuanvo ngei tu nih Karen Information Center sin ah a chim.
Mah sianginn ah cacawn mi hna hi tangcheu in tangkua tiang an dihlak 100 leng an si.
Atu bantuk bom thlaknak hi, September 16, 2022 kum ah Sagaing ramthen, Depeyin peng Letyetkung khua Middle School ah vanlawng kahnak in tualchung cacawng mi hngakchia 11 le mipi 13 an rak thi bal.
2024 kum February ah Karen National Union- KNU Taungyo pengkonh ( Brigade 2) hmun, Tantaungkyi peng, Lehto ram Minelune khua pawng ah SAC vanlawng le hriamngan kahnak ruang ah hngakchia 1 telh in minung 4 an thi tiah KNU nih a langhter.
About The Author
