Kawlin Peng Ni 3 Chung Kahdohnak Ah SAC Ralkap Thilri Cheukhat An Lak Khawh
The Chinland Post | 2023 June 8 — Sagaing ramṭhen, Kawlin peng ah ni 3 chung kahdohnak a chuak i SAC ralkap 2 an thi, 13 an i hliam tiah Kawlin PDF – KLPDF nih a thanh.
June 2 in June 4 tiang PDF Kawlin Battalion 1 le SAC ralkap Infantry 363, Infantry 369 hna karlak ah kahdohnak a chuah hi a si i kahdohnak chung ah SAC ralkap 2 an thi, 13 hliam an tuar leng ah raltuknak thilri cheukhat zong an lak khawh tiah thawng theih a si.
May 27 ah Kawlin peng in a rak chuak mi SAC ralkap 70 hrawng cu Kawlin pengkomh B01 hmunhma chung ah a um mi Kyaukputu khuate an luh lio ah B01 nih an kah hna.
June 4 ah ralkap phu 2 an i fonh i Ongpin khuate lei an kir lio ah B01 nih an kah ṭhan hna i hmai an fon khawh ti lo caah Ongpin khua ah an lut ṭhan tiah an langhter.
Cu SAC ralkap pawl nih vanlei le hriamngan bawmhnak hal in hnu kir ṭhan an i tim tiah theihternak an tuah.
About The Author
