July 25, 2024

Khuapi Lak Kahdohnak Pawl Pehzulh In Kan Tuah Lai Tiah CNF Nih An Chim

0

The Chinland Post | 2024 March 25 – Chin ramkulh hmunhma zapi hramhram uknak tang in kan luat i mah tein kan i uk khawh nakhnga Chin ramkulh chung ah SAC nih a uk mi khua pawl ah kahdohnak tuah in khuapi lak kahdohnak pawl pehzulh in tuah ding timhtuahnak kan ngei tiah CNF in chimphuannak nawl a ngeitu Salai Htet Ni nih DVB ah a chim.

Khuapi lak kahdohnak pawl nih a fawi mi operation a si hrimhrim a si lo i fek tein hmunhma an khuarnak pawl kahdoh a si caah nunnak pek le hliamtuar tam khun a si.

Cu bantuk kahdohnak kan tuah khawh nakhnga one command tang ah kan um khawh a herh bantuk in a ngan bik mi harnak cu SAC lei nih mipi kha khamnak caah a hman hna hi a si tiah Salai Htet Ni nih a chim fawn.

Chin ramkulh ah a um mi khuapi 18 cu CNF le Chin hriamtlai phu hna nih an uk khawh cang i cu an uk khawh mi khua chung ah India-Myanmar ramri, chawlehnak ah a biapi ngai mi Rihkhawdar khua zong aa tel.

Cu ramri chawlehnak hi CNF le Chin hriamtlai phu hna nih an uk khawh i Myanmar ramchung umkalnak nawl cu zalong tein kan awnh hna tiah a chim.

Atulio caan ah SAC hi kahdohnak kip ah a sung thluahmah i mipi dothlennak phu lei nih dothlennak tei a si cang lai caah a fek mi biakhiahnak he dothlennak ah teltum a herh tiah a chim fawn.

Chin ramkulh chung hmunhma 70% leng cu Chin hriamtlai phu hna nih an tlaih khawh i Chin ramkulh chung ah hriamtlai phu 17 an um.

Cu hriamtlai phu hna nih anmah he aa pehtlai mi khua pawl kha an uk hna i Chinland uknak phu he an i bawm hna. SAC ralkap pawl cu an uknak khua chu g dah ti lo a leng ah an chuak kho lai lo tiah a chim fawn.

Chin ramkulh chung ah SAC ralkap le CNF/A, Chin dothlennak phu hna karlak ah a fak ngaingai mi kahdohnak a um lo nain Chin ramkulh ramri, Sagaing ramthen, Kalay ahcun kahdohnak a fah lio a si.

About The Author

Na ruahning rak langhter ve.. (Leave a comment)