June 17, 2024

KNU Brigade 5 Hmunhma September Thla Chung Kahdohnak Ah SAC Ralkap 39 An Thi

0

The Chinland Post | 2023 October 3 – Karen ram, KNU Brigade 5 hmunhma, September thla chung ah a cang mi kahdohnak pawl ah SAC ralkap 39 an thi tiah KNU Brigade 5 nih thawng a thanh.

September 1 in September 30 tiang KNU Brigade 5 nih a tlaihnak hmunhma chung ah, KNLA le SAC ralkap, BGF hna karlak ah kahdohnak voi 84 a chuak tiah theih a si.

Kahdohnak pawl chung ah SAC lei 39 an thi i Captain 2 telh in 46 an i hliam, SAC ralkap inn 1 an hrawh khawh i thlakhat chung ah KNU Brigade 5 kuttang ralkap 5 an thi i 13 an i hliam tiah theih a si.

Ni 15 chung ah SAC ralkap nih Jet Fighter in voi 10 kahdohnak a rak tuah i 500lb a rit mi Cluster Bomh lung 23 an thlak leng ah Machine Gun zong in a kah, cun vawlei lei in hriamngan lung 20 a kah, SAC ralkap pawl nih Hpapun khuami 1 an thah i SAC ralkap kah mi hriamngan nih tarnu pakhat a khen caah a thi tiah theih a si.

Jet Fighter vanlawng pawl nih Mutraw pengkomh hmunhma 6 ah kahdohnak a tuah caah kum 15 tang siahngakchia 3 le sianginn committee chungtel 1 an thi i siahngakchia, siangcachim le khuami 8 an rak i hliam.

Cun SAC ralkap vanlei kahdohnak ruang ah biaknak lei inn 2, sianginn 1 le mipi inn 12 a rawk tiah KNU Brigade 6 nih thawngthanhnak an tuah.

About The Author

Na ruahning rak langhter ve.. (Leave a comment)